Степанов Николай Саввич

Степанов Николай Саввич (1922—1992) — Сэбиэскэй Сойуус Дьоруойа, Аҕа дойду улуу сэриитин кыттыылааҕа.

1922 сыл ыам ыйын 13 күнүгэр Бүлүү улууһун Өргүөт (Арыылаах) нэһилиэгэр төрөөбүтэ. Сэрии саҕаланыан иннинэ нэһилиэк Сэбиэтин исполкомун сэкиритээринэн үлэлээбитэ, Бүлүү педучилещытн 1-кы кууруһун бүтэрбитэ.

Аармыйаҕа 1943 с. бэс ыйыгар Бүлүү оройуоннааҕы военкомаатынан ыҥырыллан барбыта.

Тыылга кылгас кэмнээх байыаннай үөрэххэ үөрэнэн бүтэрбитэ. Сэриилэһэр аармыйаҕа тиийэн 1944 с олунньутуттан 5-с механизированнай биригээдэтин 1-кы мотострелковай батальонугар пулеметчик буолбута.

Украина, Модавия, Румыния, Югославия, Венгрия, Австрия, Чехословакия уонна Прага куорат босхолоһуннарыгар кыттыбыта. Арҕаа сэрии бүппүтүн кэннэ Уһук Илин фронугар тиийэн Япония Квантунскай аармыйатын урусхаллааһыҥҥа кыттыбыта.

1944 с. кулун тутар ыйга Степанов подразделениета Соҕуруу Буугу туораан анараа кытылга тахсар бириккэһи ылар. Онно буойун уҥуор тахсан пулеметун уотунан пехота Маньковка дэриэбинэни ыларыгар кыах биэрбитэ, кыргыһыыга тус бэйэтэ 15 өстөөҕү уонна биир пулемет расчетун суох гыммыта. Ити хорсун быһыытын иһин Дьоруйо аатыгар түһэриллибитэ. Ол гынан баран дөкүмүөннэрэ сүтэн наҕаарадатын ылбатаҕа.

Сэбиэскэй Сойуус Дьоруойун аата 1990 с. ыам ыйын 5 күнүгэр иҥэриллибитэ, ону бэйэтэ Москубаҕа Кремльга баран туппута.

Дьоруой аатын Бүлүү куорат 3-с нүөмэрдээх оскуолата уонна уулусса сүгэллэр, Балаҕаччы нэһилиэгэр кини бүүһэ туруоруллубута