Лукин Тимофей Спиридонович

Лукин Тимофей Спиридонович (1913—15.04.1980) — биллиилээх сылгыһыт, Социалистическай Үлэ Геройа.

Олоҕун олуктара

1913 сыллаахха Амма улууһугар Алтан с. дьадаҥы бааһынай дьиэ кэргэнигэр төрөөбүтэ.

1931 сыллаахха саҥа тэриллибит «Саҥа дэриэбинэ» колхозка киирбитэ. Сотору кэминэн биригэдьииринэн, салалта чилиэнинэн талыллыбыта.

1942—1946 сс. — Сэбиэскэй Аармыйа кэккэтигэр сулууспалаабыта.

1946 сыллаахха сылгы ферматын сэбиэдиссэйинэн анаммыта.

ССРС Үрдүкү Сүбэтин 1949 сыл бэс ыйын 30 күнүнээҕи Ыйааҕынан сүөһү иитиитигэр үрдүк көрдөрүүлэрин иһин Тимофей Спиридонович Лукиҥҥа Социалистическай Үлэ Геройун аата иҥэриллибитэ.

Биллиилээх сылгыһыт таһаарыылаах үлэтин туһунан суруйааччы Күннүк Уурастыырап суруйбута.

Саха АССР Үрдүкү Сүбэтин III уонна IV ыҥырыыларын депутатынан талылла сылдьыбыта.

Наҕараадалара уонна ытык ааттара

• Ленин уордьана

Сигэлэр

• Владимир Пестерев. История Якутии в лицах. — Якутск: «Бичик», 2001.