Давыдов Дмитрий Леонидович
Давыдов Дмитрий Леонидович —- (1983, олунньу 22, Амма, Амма улууһа) киинэ режиссера, Амма улууһун Чапчылҕан оскуолатын дириэктэрэ. «Тыалга кытыастар кутаа» (нууч. Костер на ветру) диэн киинэтэ ImagineNative диэн Канаадаҕа Торонто куоракка ыытыллар бөдөҥ киинэ бэстибээлигэр 2016 сыллаахха бастыҥ дыраама (ааҥл. «Best Feature Drama») аатын сүкпүтэ. Ону таһынан Бусааҥҥа (Соҕуруу Кэриэйэ) Аан дойдутааҕы киинэ бэстибээлигэр (ааҥл. BIFF)[1] уонна Брисбиэҥҥэ (Аустралиа) Азия уонна Чуумпу акыйаан киинэ бэстибээлигэр (ааҥл. Brisbane Asia Pacific Film Festival) кыттыыны ылбыта[2].
Аммаҕа төрөөбүт. Оскуоланы бүтэрэн баран Нүөрүҥгүрүгэ начаалынай кылаас учууталыгар үөрэммит. Онтон Аммаҕа төннөн оскуолаҕа харабылынан, онтон социальнай педагогунан, кэлин саабыһынан үлэлээбит. Билигин Чапчылҕан оскуолатын дириэктэрэ.
Кэргэннээх, икки оҕолоох.
Айар үлэтэ уларыт
Оскуолаҕа үлэлии сылдьан орто саастаах оҕолорго кулууп тэрийбит, ол иһинэн кылгас Ералашка майгынныыр киинэлэри устар эбит. Кэлин көрдөөх уонна куттааллаах киинэлэри устан көрбүт. Онтун оскуолаҕа уонна олохтоох кулуупка көрдөрөр эбит. Мантын бэйэтэ иитэр үлэ иһинэн этэ диир. Кэлин идэтийбит, үрдүк таһымнаах киинэни устуон баҕарбыт. Ол сылдьан «Тыалга кытыастар кутаа» сюжетын толкуйдаабыт. Сценарийын икки нэдиэлэ устата бастаан нууччалыы суруйан бүтэрбит, онтон сахалыы тылбаастаабыт. Биир дойдулааҕа кинорежиссер Степан Бурнашев сүбэ-ама буолан, устар дьону, аппаратуураны булбут. Киинэтин, бэйэтэ кэпсииринэн, Амма улууһун бөһүөлэктэригэр Аммаҕа, Бөтүҥҥэ, Чапчылҕаҥҥа, Чакырга 2014 сыл кыһыныгар 15 хонук устата устубут. Артыыстарын барыларын кэриэтэ эрдэттэн билэр дьонун ылбыт, бу дьон ити бөһүөлэктэр олохтоохторо, идэтийбит артыыстар буолбатах.
Киинэҕэ уустук дьылҕалаах дьон олоххо тус-туһунан сыһыаннара көстөр.
Торонтоҕо буолбут бэстибээл иннинэ аҕай, эмиэ 2016 сыл алтынньытыгар, Соҕуруу Кэриэйэ Пусаан куоратыгар ыытыллар Азия киинэтин бэстибээлигэр Арассыыйа аатыттан кыттыбыта[3]. 2017, муус устар 30, Омскай куоракка буолан ааспыт «Движение»-2017 киинэ бэстибээлигэр «Тыалга кытыастар кутаа» икки номинация кыайыылааҕа буолбут: «Бастыҥ режиссёр үлэтэ» — Дмитрий Давыдов уонна «Бастыҥ эр киһи толорооччута» — Алексей Устинов, ону таһынан киинэ ааптарыгар Омск Ил дарханын анал бирииһин ылбыт[4].
Уһулбут киинэлэрэ уларыт
- 2016 — Тыалга кытыастар кутаа