Петрашевскай дьыалата

Петраше́вецтар — М. В. Буташевич-Петрашевскай дьиэтигэр мустан мунньахтааччылар, бу дьону 1849 с. Николай I ыраахтааҕы бырабыыталыстыбата былааһы утарбыттарын иһин сууттаабыта уонна хаатырҕаҕа ыыталаабыта. Бары да көҥүл санаалаах дьон этилэр эрээри бэйэлэрин көрүүлэринэн араас дьон эбиттэр. Сорохторо өрөбөлүүссүйэ оҥоруохтарын баҕараллара, сорохторо олоҕу эйэ-дэмнээхтик тупсарыы туһунан идиэйэлэри тарҕаталлар этэ. Сууттаммыт дьонтон үгүстэрэ Белинскэй Гогольга суруйбут суругун тарҕаппыттарын иһин уонна мунньахха сылдьан баран тыллаабатах буруйдарыгар эппиэккэ тардыллыбыттара.

Петрашевскай куруһуога киэҥник биллибит биир төрүөтүнэн онно эдэр Достоевскай кыттыбыта буолар. Иккис биллибит төрүөтэ - ытарга уураахтаан, ону дьиҥнээхтии ытаары гыммыт курдук көрдөрөн баран, бүтэһигэр өлүүнү хаатырҕанан солбуйар туһунан уураах аахпыттара буолар. Биир сууттанааччы маны тулуйбакка иирэн хаалбыта.