Румянцев Василий Гаврильевич

Румянцев Василий Гаврильевич — саха аатырбыт тустууга, көҥүл тустууга тренерэ.

1931 с. II Өспөх нэһилиэгэр төрөөбүтэ. Аҕата Гаврил Кононович Румянцев, булчут. Ийэтэ Дарья Яковлевна - Күүстээх Даарыйа ыһыахтарга тустара.

1951 с. Ленинградка география учууталын идэтигэр үөрэнэ киирбит. Манна саҥа тэнийэн эрэр самбонан дьарыктанар. 1953 с. Ленинград чөмпүйүөнэ буолар. 1955 с. үөрэҕин бүтэрэн кэлээт биир дойдулааҕа Н.Н. Тарскай сүбэтинэн пединститутка көҥүл тустуу бастакы сиэксийэтин тэрийэр. Манна эрчийбит уолаттарыттан Дмитрий Данилов сахалартан бастакы спорт маастара буолбута, Николай Гоголев РСФСР бастакы чөмпүйүөнэ буолбута.

1956 с. ыарахан аҥаардаах ыйааһыҥҥа Саха Өрөспүүбүлүкэтин чөмпүйүөнэ буолар. Салгыы Уһук Илин уонна Сибиир зонатыгар сахалартан аан бастааан бастыыр, РСФСР финаалыгар тустар. Саха Өрөспүүбүлүкэтин 17 төгүллээх чөмпүйүөнэ буолбута[1].

Быһаарыылар уларыт

  1. Ахмет Дмитриев Өспөх уолана // Саха тустуута: үйэ аҥаардаах чүөмчүлэр. — Дь.: Бичик, 2012. — С. 10. — 160 с. — ISBN 978-5-7696-3969-2