Авоська эрэли бэлэхтиир

«Авоська эрэли бэлэхтиир» — «НКО-Сервис» хаачахтаммыт эппиэтинэстээх уопсастыба социальнай-экологическай бырайыага. Бу бырайыак сүрүн соруга — полиэтилен бакыаты авоськаннан (сиэткэ суумкананан) солбуйуу, итиэннэ доруобуйаларыгар хааччахтаах дьону үлэнэн хааччыйыы буолар.

Бырайыак сүрүн тэрийээччилэрэ — Арассыыйа инбэлииттэрин сойууһа уонна «НКО-Сервис» ХЭУо.

Бырайыак дэбииһэ: «Биир авоська мөлүйүөн былаастык бакыаты солбуйар».

Устуоруйата

«Авоська эрэли бэлэхтиир» бырайыагы Евгений Рапопорт «Араҕас бакыат оҕолорго көмөлөһөр» диэн аахсыйа кэнниттэн толкуйдаан таһаарбыта. Аахсыйа сүрүн сыалата тулалыыр эйгэҕэ буортулаах былаастык бакыаттартан аккаастаны этэ. Ол курдук «Билла» супермаркеттар ситимнэрин маҕаһыыннарыгар бакыаты атыыласпыт бородууктаны кытары босхо биэрэр буолбакка, харчыга атыылыыр буолбуттара. Оттон онтон киирбит үбү-аһы бүүс бүтүннүү ыалдьар оҕолор эмтэниилэригэр ыыппыттара.

Ити хамсааһын кэнниттэн Евгений Рапопорт тулалыыр эйгэни киртиппэт авоськалары оҥорон таһаарыыга ылсыбыта уонна онуоха доруобуйаларыгар хааччахтах дьону — инбэлииттэри кытыарбыта. Кинини Арассыыйа инбэлииттэрин сойууһа өйөөбүт. Онон иккиэн кыттыһан «НКО-Сервис» диэн тэрилтэни арыйбыттара.

Бастакы авоськалар дизайыннарын, бырайыак чэрчитинэн, Денис Симачев толкуйдаабыта. Салгыы атын сиэрийэлэри Андрей Шаров уонна Андрей Бартеньев айбыттара.

Авоськаны «суровай пряжа» ньыматынан баайаллар.

2015 сыл муус устарыгар бырайыак табаардара Москубаҕа, Санкт-Петербурга уонна Тольяттига итиэннэ интэриниэт маҕаһыыннарга атыыланар буолбуттара.

«Авоська эрэли бэлэхтиир» бырайыак авоськаларын барытан доруобуйаларыгар хааччахтаах дьон оҥороллор. Ол курдук Евгений Рапопорт бы дьыалаҕа ылсан баран үлэтин-хамнаһын үөрэтэ сылдьан Сэбиэскэй Сойуус авоськаларын барытын көрбөт дьон өрөллөрүн туһунан билбит уонна ол суолу тутуһарга быһарыммыт.

Е.Рапопорт авоськаларын өрдөрөрүгэр, бастатан туран, урут 1980-с сылларга бу дьыаланан дьарыктаммыт дьону көрдөөн булбут. Онон бырайыакка биир бастакынан Чувашия Канаш куоратыгар баар көрбөттөр тэрилтэлэрэ кыттыспыт. Кэлин авоськаны оҥорооччу элбээбит.

Бу бырайыак сүрүн уратыта диэн, авоськаны оҥорооччулар дьиэлэригэр олорон үлэлииллэр. Ол курдук биир киһи ыйга ортотунан 200 авоськаны оҥоруон сөп.

Авоська тутааҕын уонна араас суумкалары, хахтары дьүлэй уонна сүһүөхтэрэ мөлтөх дьон оҥороллор.

Авоська оҥоруутуттан киирбит үп-харчы сорох чааһа дьоруобуйаларыгар хааччахтаах дьоҥҥо туһуламмыт бырагыраамалар олоххо киирэллэригэр уонна талааннаах инбэлиит-оҕолорго барар.

Бырайыак тэрийээччитэ сотору кэминэн сылга 10 мөлүйүөн авоськаны оҥорор таһымҥа тахсыан баҕарар. Оччотугар 6 тыһыынча кэриҥэ инбэлиит үлэнэн хааччыллар.