Бикипиэдьийэ:Пресс-релиз/2020 Түүр марафона

Бу пресс-релиз тарҕатыллар барыла.

Түүр омуктарга сыһыаннааҕы суруйууга күрэс

Түүр тылларынан тахсар бикипиэдьийэлэр көҕүлээһиннэринэн Бикипиэдьийэ араас салааларын ыккардыларыгар ситими олохтуурга, омуктар ыккардыларыгар сыһыаны бөҕөргөтөргө анаан бу күрэс 2020 сыл бэс ыйыгар ыытылынна.

Күрэс Сахалыы Бикипиэдьийэҕэ бэс ыйын 1 күнүттэн бэс ыйын 30 күнүгэр диэри марафон быһыытынан ыытылынна. Быһааран эттэххэ, бикипиэдьийэҕэ марафон диэн болдьоммут кэм иһигэр элбэх ыстатыйаны суруйбут киһи кыайар күрэһин ааттыыллар.

Марафон кыайыылаахтара уонна кыттыылаахтара

Марафон түмүгүнэн дьүүллүүр сүбэ биэс кыайыылааҕы талла. Бэһис миэстэҕэ уруккуттан Бикипиэдьийэҕэ суруйар учуутал идэлээх Арчы Уола диэн кыттааччы таҕыста. Төрдүс миэстэни саҥа суруйан эрэр Хабырыыл кыыьа диэн ааттаах киһи ылла. Ханна олороро, кимэ-туга чопчу биллибэт. Үһүс эрэллээх миэстэни 73 ыстатыйаны суруйбут Луиза Петрова диэн кыттааччы ылла. Кини бэйэтин тус сирэйигэр Бүлүү Тыымпытыттан төрүттээхпин диэбит, идэтинэн провизор. Бу эмиэ саҥа суруйан эрэр кэскиллээх кыттааччыбыт, уонна саамай дьиктитэ диэн - төлөпүөнтэн суруйар. "Ыал ийэтэ хайдах көмпүүтэри манаан баран олоруохпунуй, ас астыы сылдьан иҥин төлөпүөммүттэн суруйабын" - диэтэ бассаабынан.

Бастакы уонна иккис миэстэни икки уопуттаах кытааччыларбыт Kuchaai уонна Tumarca былдьастылар. Тиһэх күҥҥэ диэри ким кыайара биллибэккэ сылдьыбыта. Иккиэн да наһаа таһаарыылаахтык үлэлээтилэр, сүүстэн тахсалыы ыстатыйаны суруйдулар. Киһи үөрэрэ диэн, ыстатыйалара наһаа үчүгэйдик суруллубуттар, силиктэрэ сиппит, киһи сэргээн ааҕар матырыйаала буоллуллар. Мантан биирдэстэрэ Чурапчыттан төрүттээх саха биллиилээх суруналыыһа, иккистэрэ - тас дойдуга устудьуоннуур Нүөрүҥгүрү куораттан төрүттээх эдэр киһи. Онон, тыҥааһыннаах киирсии түмүгэр бастакы миэстэ буолла 118 ыстатыйаны суруйбут Tumarcha, оттон 103 ыстатыйалаах Kuchaai - иккис буолла. Кыайыылахтарга барыларыгар төлөннөөх эҕэрдэ!

Маны таһынан күрэскэ өссө 6 киһи кытынна. Балар истэригэр Москубаҕа, Новосибирскайга үлэлиир сахалар, Дьокуускайга олорор Ньурбаттан, Үөһээ Бүлүүттэн төрүттээх түмэл уонна информагенство үлэһиттэрэ, нефтегаз эйгэтигэр үлэлиир инженер уонна Уус-Алдаҥҥа олорор киинэ оператора бааллар. Бу дьоҥҥо, үлэлэрин быыһыгар суолта биэрэн кыттыбыттарыгар, көх-нэм буолбуттарыгар улахан махталбытын тиэрдэбит!

Суруллубут ыстатыйалар тиэмэлэринэн

Күрэс саҕаланыан иннинэ хас биирдии күрэскэ кыттар бикипиэдьийэ бэйэтигэр сыһыаннаах ыстатыйалар испииһэктэрин оҥорбута. Саха сириттэн эмиэ оннук испииһэк оҥоһуллубута. Ол испииһэккэ киирбит өйдөбүллэр, дьон, түбэлтэлэр тустарынан ыстатыйалары уонна онно киирбэтэх гынан баран түүрдэргэ сыһыаннаах ыстатыйалары араас омук дьоно бэйэлэрин бикипиэдьийэлэригэр суруйуохтаахтар этэ. оннук, холобур, Башкиир Бикипиэдьийэтигэр 7 сахаҕа сыһыаннаах саҥа ыстатыйа баар буолла.

Оннук Бикипиэдьийэ 12 салаатыгар тыһыынчаннан саҥа ыстатыйа эбилиннэ. Сахалыы салааҕа 331 ыстатыйа киирбититтэн, 330 ыстатыйа ирдэбилгэ хоруйдуур буолан, күрэскэ кытынна.

Онтон 148 ыстатыйа, ол эбэтэр ыстатыйа ахсааныттан 45%, биллиилээх дьон туһунан сурулунна. Олор истэригэр былырыгы баһылыктар уонна сэрииһиттэр да, аныгы ырыаһыттар уонна учуонайдар да бааллар.

42-лии ыстатыйа (13%) омуктарга сыһыаннаах (холобур, "Чулымнар", "Сарыг йоҕырдар") уонна култуураҕа сыһыаннаах (холобур, "Эл Ойын", "Ырх Битиг") ыстатыйалар буоллулар. 35 ыстатыйа (11) түүр былыргы устуоруйатыгар сыһыаннаах (холобур, "Ноҕай Ордуута", "Хоҥорой"), 4-6 бырыһыаны географияҕа ("Сугомак күөл", "Кызыл"), тылга ("Сойот тыла", "Салар тыла"), тутууларга ("Акбузат ипподром", "Кыыс башнята") уонна итэҕэлгэ ("Умай", "Алтун йарук") сыһыаннаах ыстатыйалар ыллылар.

Суруллубут ыстатыйалар омукка сыһыаннарынан

Оттон суруллубут ыстатыйалары омуктарынан ылар буоллахха, саамай улахан болҕомтону туурактар тардыбыттар - хас төрдүс ыстатыйа кинилэргэ сыһыаннаах буолан биэрдэ (79 ыстатыйа, суруллубут ыстатыйаттан 24 бырыһыана). Иккис миэстэҕэ ханнык да аныгы түүрдэргэ быһаччы сыһыана суох, ол аата түүрдэргэ барыларыгар сыһыаннаах уопсай ыстатыйалар ыллылар, маннык ыстатыйа ахсаана 70 (21%) буолла. Маннык ыстатыйаларга, холобур, Маҥан Ордуу, Ашина, Кучум диэннэр киирэллэр. Кыттааччылар болҕомтолорун тардыбыт үһүс бөлөх - казаахтарга сыһыаннаах ыстатыйалар (11%). Төрдүс - татаардар (8%), бэһис - башкиирдар (5%) буоллулар. Тыыбалар, хакаастар, туркменнар, ноҕайдар, кырыым татаардара, кыргыыстар, азербайджааннар 1-4 бырыһыаны ыллылар. Өссө 13 омук туһунан биирдии-иккилии ыстатыйа сурулунна.

Түмүк тыл

Кыайыылаахтар Түүр биикиһиттэрин бөлөҕө диэн уопсастыбаннай тэрилтэ аатыттан сыаналаах бириистэри тутуохтара.

Күрэс түмүктэннэ. Ол эрээри, Бикипиэдьийэҕэ дьон бириис эрэ иһин суруйбат, дьиҥэр, билиини хаҥатаары, саха үйэлэр тухары муспут билиитэ сүппэтин диэн, саха киһитэ аан дойду дьоно-сэргэтэ бүттүүнэ муспут билиитин төрөөбүт тылынан ааҕарын ситиһээри суруйабыт. Онон, харса суох суруйуҥ - Сахалыы Бикипиэдьийэҕэ ыстатыйалары элбэтиҥ, дьон чахчы туһанар сирэ оҥоруҥ!

Тэрийэр бөлөх

Ситимнэһии

Эппиэттээх: Павлов Николай, halan@ya.ru, Дьокуускай

Бикипиэдьийэ ситимҥэ аадырыһа: https://sah.wikipedia.org/