Борисов Георгий Дмитриевич

Борисов Георгий Дмитриевич — учуутал, педагогическэй үлэ бэтэрээнэ, Иккис Аан дойду сэриитин кэмигэр эпиһиэр, сэрии кэнниттэн Австрияҕа комендатура сулууспалааҕа, Бүлүү улууһун Үгүлээт нэһилиэгин бэтэрээннэрин сэбиэтин бэрэстээтэлэ, Анаабыр улууһун Ытык киһитэ, "Саллаат сэһэнэ" диэн сэрии туһунан ахтыы кинигэ ааптара. Бүлүү педучилищетын выпускнига.

Олоҕун олуктара

Ыам ыйын 6 күнүгэр 1922 с. Саха АССР Бүлүү оройуонун Тылгыны нэһилиэгэр Хааҕы диэн сиргэ Миитэрэй (хос аата Лапаан) уонна Мотуруона Барыыһаптарга бастакы оҕонон төрөөбүтэ.

Үгүлээт 7 кылаастаах оскуолатын бүтэрэн 1938 с. Н.Г. Чернышевскай аатынан Бүлүүтээҕи педагогическай техникумҥа (билигин колледж) үөрэнэ киирэр. Сэрии саҕаланыыта бэс ыйын 22 күнүгэр 1941 сыллаахха ситиһиилээхтик бүтэрэр. Үөрэҕин бүтэрээт атырдьах ыйын ортотуттан Бүлүү орто оскуолатыгар саха тылын учууталынан үлэтин саҕалаан эрдэҕинэ, Хампа 7 кылаастаах оскуолатыгар саха тыла, математика, физкультура учууталынан ыыталлар. Сэрии буолбутунан сибээстээн ССРС бүттүүнүн үрдүнэн байыаннай үөрэхтээһиннэр саҕаланаллар. Хампа нэһилиэгэр хайыһардьыттары үөрэтэр куурус аһыллар. Онно Батальон хамандыырынан сылдьар. Бу кууруска кэлин Сэбиэскэй Сойуус дьоруойа буолбут Н. А. Кондакову уонна Н.С. Степановы кытта үөрэнэр.

1942 сыллаахха бэс ыйын 22 күнүгэр аармыйаҕа ыҥырыллар. Москубатааҕы байыаннай-бэлитиичэскэй училищеҕа үөрэнэн (ол саҕана Челябинскай уобалас Шадринскай куоратыгар көһөрүллэн үлэлиирэ), 1943 сыллаахха лейтенант сыбаанньатын ылан Бастакы Украинскай фроҥҥа түбэһэр. 136-с стрелковай дивизияҕа разведка хамандыырын солбуйааччытынан, сибээс эппиһиэринэн сулууспалыыр. Польша Сандомир куоратын аттыгар илиитигэр бааһыран госпитальга эмтэнэр, онтон Ворошилоградскай гвардейскай минометнай полкаҕа 2-с батарея взводун хамандыыра буолар. Польшаҕа, Чехословакияҕа, Австрияҕа уонна Германияҕа сэриилэһэр. Онтон ньиэмэс чаастарын тобохторун утары охсуһар огневой взводу хамаандалыыр. Онтон Австрияҕа Айген куорат байыаннай комендатуратыгар сулууспалыыр.

1947 сыллаахха ыам ыйын 25 күнүгэр аармыйаттан демобилизацияламмыт.

"Күүлэт" сопхуоска учууталлыыр, оскуола дириэктэринэн үлэлиир. 1951-53 сс. Дьокуускайдааҕы сэбиэскэй-партийнай оскуолаҕа үөрэнэр. 1953 с. Анаабыр оройуонугар баартыйа райкомун 2-с сэкиритээринэн ыытыллар. 1957 с. Кыһыл чуум сэбиэдиссэйинэн ананар, онтон 1959 с. 7 кылаастаах Сааскылаах оскуолатыгар дириэктэр буолар. 1960 с. Бүлүү оройуонун Бастакы Күүлэтигэр физика уонна математика оскуолатыгар учууталлыыр, 1961 сыллаахтан Иккис Күүлэккэ оскуола дириэктэрэ буолар. 196-70 сс. Бүлүү оройуонун оскуолаларыгар учууталлыыр. Кэргэниттэн арахмар. 1970 сыллаахха хайыыга сытар. 1971 с. Абыйга физика учууталынан ананар. Онтон Кэбэргэнэ 8 кылаастаах оскуолатыгар дриэктэрдиир. 1973 с. Уус Маайа Эдьээнигэр 8 кылаастаах оскуолаҕа математика учууталынан үлэлиир. Ол сылдьан Абраомва Любовь Васильевналыын ыал буолар.

1974 с. Чөркөөххө орто оскуолаҕа военругунан ананар, онтон 1975 с. Бүлүү Үгүлээтигэр военруктуур. Онно биэнсийэҕэ тахсар, нэһилиэк бэтэрээннэрин сэбиэтин бэрэстээтэлинэн талыллан үлэлиир.

2000 сыл от ыйын 17 күнүгэр өлбүт.