Дарбасов Гаврил Афанасьевич

Дарбасов Гаврил Афанасьевич — Аҕа дойду Улуу сэриитин кыттыылааҕа.

1912 сыллаахха Мэҥэ Алдан нэһилиэгэр Томпо оройуонугар төрөөбүтэ. 1934 с. Дьокуускайдааҕы учуутал техникумугар үөрэммит. 1934—1935 үөрэх сылыгар Ытык Күөлгэ көрдөрүүлээх оскуолаҕа учууталынан ананан, 3 сыл үлэлээн баран, Кириэс Халдьаайыга эмиэ 3 сыл үлэлээбит. Математиканы, физиканы, химияны үөрэтэрэ. 1940—1941 сс. үөрэх дьылыгар Чычымах оскуолатыгар ананан кэлэн биир сыл үлэлээт, 1941 с. бастакы ыҥырыыга Аармыйаҕа ыҥырыллыбыт. 1944 сыл балаҕан ыйын 8 күнүгэр өллө диэн биллэриитэ кэлбитэ.

«Коммунист» хаһыат 1943 сыллааҕы олунньу 24 нүөмэригэр «Таатта пионердарыгар, комсомолецтарыгар уонна бары үөрэнээччилэригэр» диэн ааттаах суруга тахсыбыта. Онно кини суруйбут: «Бу билиҥҥи күннэр историяҕа кыһыл көмүс буукубанан суруллан киириэхтэрэ». Сурукка 260 чаас, 2688 полевой почта диэн аадырыһа ыйыллыбыт.