Дьабай ойуун

Дьабай Ойуун, Герасимов Роман Адамович - Бүтэйдээххэ олоро сылдьыбыт ойуун.

Түөрт сайылыгынан, Уулуссанынан кыстаан, Тураҥнаах илин баһыгар сайылаан олорбут киһи. Хойут икки хараҕа суох, тараҕай оҕонньор буолан олорорун Сергеев Егор Герасимович кыра сылдьан көрөр этим диэн суруйбут ахтыыта К.К. Родионов кинигэтигэр киирбит.

Бу оҕонньор Советскай былаас саҕана уоран көрүүлэнэн, сэрэбиэйдиир этэ. Ол курдук, Бүтэйдээх ыалларын сүтэрбит сүөһүлэрин, сылгыларын, сирин-уотун чопчу ыйан, булан биэрэрэ. Биирдэ Аргунов Трофим Андреевич көрүүчэй таһар атгара сүппүтүн, Табаҕа Андреев сиригэр баалларын чопчу ыйан, икки эдэр киһи булан тоһуйуохтара диэбит этэ. Онтукайа чахчы булбут этилэр.

Бэйэтэ олорон эрэ кутуран көрүүлэнэр идэлээх этэ. Биирдэ оннук көрүүлэнэн олордоҕуна, Аргунов Трофим Андреевич сүөһү бостуугунан сылдьан талах кымньыытын хаалларбытын, Давыдов Степан Григорьевич диэн биһиги саастыыта оҕо булан, күүгэһи охсуолуу сылдьан, алҕас оройго охсон, көрүүлэнэрин тохтотон кэбиһэр. Степаны ийэтэ таһыйаары гыммытын, «оҕо мэниктээн алҕас оҕустаҕа, мөҕүмэ» диэн тохтотор. Уонна этэр: - «Сайылыкпыт тула кыһыл тураҕас ат кистии- кистии тоҕо сүүрэрий?»- диэн истэн олорооччулартан ыйытар. Онтуктара ол күн киһи оһоллонурун билбит эбит.

Бастакы ойоҕо өлбүтүн кэннэ Аринкина Вера Иннокентьевнаны кэргэн ылан биир оҕоломмуттар, ол уоллара Герасимов Афанасий Романович кэлин улаатан Моорук Суолатыгар кэргэннэнэн, оҕолонон баран эмискэ эдэр сааһыгар өлбүтэ.