Ксенофонтов Василий Васильевич

Ксенофонтов Василий Васильевич, саха. 1905 сыллаахха Маалыкайга төрөөбүтэ, ситэтэ суох үрдүк үөрэхтээх. Салайар, партийнай, хаһаайыстыбаннай үлэлэргэ үлэлээбитэ, гражданскай сэрии партизана. Москва куорат оройуонун военкоматынан 1941 с. от ыйын 16 күнүгэр армияҕа ыҥырыллыбыта.

Маалыкайга төрөөбүт биһиги биир дойдулаахпыт саха бастакы революци­онер­дарыттан биирдэстэрэ Михаил Васильевич Ксенофонтов (Мегежекскэй) бииргэ төрөөбүт быраата Василий Ксенофонтов. Аҕа дойду сэриитигэр дьиҥ-чахчы геройдуу быһыыны көрдөрбүгэ. Кини сэрии саҕаланаатын кытта Москва куоракка I Московскай медицинскэй институкка студенныы сылдьан, баҕа өттүнэн, тылланан 1941 сыл от ыйын 16 күнүгэр 49 Армия 2 №-дээх автобронетанковай көһө сылдьар ремоннуур базатын ротатын политругунан байыаннай комиссарынан ылылыллыбыта, салгыы эвакуационнай приемник политругунан, онтон 10-с гвардейскай армия 78 №-дээх танковай биригээдэтин ротатын командирынан сулууспалаабыта, капитан званиетын ылбыта. 1942 сыл от ыйын 18 күнүгэр Московскай—Киевскэй тимир суол Тихоново-Пустынь диэн разъеһыгар өстөөх буомбалааһыныгар түбэһэн эмсэҕэлээбит 208 №-дээх арҕаанны полк 275 бааһырбыт буойуннарын уонна командирдарын олохторун көмүскээһиҥҥэ В. В. Ксенофонтов хамаандалыыр ротата геройдуу, хорсун быһыыны көрдөрбүтэ — саллааттар уонна командирдар тыыннаах хаалалларын хааччыйбыта.

Бу уһулуччулаах хорсун быһыы иһин Василий Ксенофонтов Бойобуой Кыһыл Знамя орденынан наҕараадаламмыта. Хомойуох иһин, кини 1944 сыл сэтинньи 23 күнүгэр өстөөх төгүрүктээһинигэр түбэһэн, хабыр хапсыһыыга танкаҕа умайан өлбүтэ.

Кини көмүс уҥуоҕа Литва сиригэр Владеки оройуонугар Клайпеда куорат таһыгар көтөҕүллүбүтэ. Саха норуотун биир чаҕылхай уолун, бронетанковай сэриилэр капитаннарын Василий Васильевич Ксенофонтовы байыаннайдык чиэстээн көмпүттэрэ. Василий Ксенофонтов биир дойдулаахтара Бордоҥ, Кукаакы нэһилиэгин хорсун буойуннара Москва анныгар, Ленинград, Сталинград хайысхаларынан, Новгородскай, Курскай уобаластарга, Крым тумул арыытыгар, Арҕаа Европа дойдуларыгар, гитлеровскай Германия төрүт сиригэр-уотугар тиийэ олохторун толук ууран, бэйэлэрин харыстамакка геройдуу охсуспуттара, сорохторо онно сырдык тыыннара быстыбыга, сураҕа суох сүппүттэрэ, көмүс уҥуохтара да көтөҕүллүбэтэҕэ… Ол эрэн кинилэр Ийэ дойдуларын, тапталлаах норуоттарын, дьоннорун. оҕолорун, урууларын иннигэр андаҕар биэрбит иэстэрин чиэстээхтик толорбуттара.