Лингвистическэй экспертиза

Лингвистическэй экспертиза — суут эбэтэр атын судаарыстыба уорганнара ыытар тылы (саҥаны) чинчийиилэрэ. Тэрилтэлэр, албакааттар, биирдиилээн дьон ыыттарар чинчийиилэрэ сокуон хараҕынан көрдөххө экспертиза диэн ааттаммат. Ол аата лингвистическэй экспертиза көннөрү лингвистическэй чинчийииттэн уратыта судаарыстыба сакаастааһыныгар сытар.

Суут лингвистическэй экспертизата — суут экспертизатын сорҕото, туһунан көрүҥэ. Чинчийэр биридимиэтэ — ханнык эмит гражданской эбэтэр холуобунай дьыала иһинэн саҥаны (суругу) чинчийии түмүгэр көстөр чахчылар (обстоятельства). Эбийиэгэ — сурукка киирбит саҥарыы (биирдиилээн тылтан саҕалаан бүтүн тиэкискэ эбэтэр тиэкис бөлөҕөр тиийэ).

Эспиэр үлэтин хайысхалара

сиэр-туом өттүнэн хайысхатын быһаарыы (өһүргэтии, хоруотааһын, холуннарыы, сүөргү сибидиэнньэлэри тарҕатыы, сууту сэнээһин уо. д.а.);
сокуоннары, мөккүөрдээх докуомуннары (сөбүлэҥнэри) эридьиэстээһин/ырытыы;
саҥаран күлүгээннээһини көрдөрүү (үөҕүү, быдьар тыллар);
омугунан уонна итэҕэлинэн атааннаһыыны күөдьүтүүнү көрдөрүү;
лингвокриминалистика (киһини тылы туттуутунан булан ылыы, докумуоннары идентификациялааһын);
тылынан манипуляциалааһыны булуу (арбааһын, быыбар технологиялара)
дьон, тэрилтэ ааттарын тылга сыһыаннаах устуоруйатын ырытыы.