Лыткин Николай Николаевич

Лыткин Николай Николаевич - 1931 сыллаахха Ньурба оройуонун Бордоҥ нэһилиэгэр төрөөбүтэ, үлэ, тыыл государственнай сулууспа ветерана.

1945 сыллаахха Маалыкай сэттэ кылаастаах оскуолатын бүтэрэн баран, Кукаакы нэһилиэгин исполкомун секретарынан үлэтин саҕалаабыта. 1956 сыллаахха Дьокуускайдааҕы педагогическай институту бүтэрээт, учууталынан, Хатыы оскуолатын директорынан, районо сэбиэдиссэйинэн, Марха совхоз парткомун босхоломмут секретарынан, үлэһиттэр депутаттарын Ньурба оройуонунааҕы Советын исполкомун солбуйар председателинэн үлэлээбитэ.

1965 сылтан түөрт сыл устата ССКП Ньурба оройуонунааҕы комитетын иккис секретарынан, онтон олус уһуннук 14 сыл устата үлэһиттэр депутаттарын Ньурба оройуонунааҕы Советын ситэриилээх комитетын сирэй председателинэн бэрт таһаарыылаахтык үлэлээбитэ. Ол кэнниттэн партия Саха уобаластааҕы комитетын партийнай комиссиятын инструкторынан үлэлээн, 1989 сыллаахха пенсияҕа тахсыбыта. Саха АССР тохсус уонна онус ыҥырыылаах Үрдүкү Советын депутатынан талылла сылдьыбыта. Кини өр кэмнээх, үтүө суобастаах үлэтэ «Үлэ Кыһыл Знамята», «Бочуот бэлиэтэ» орденнарынан, хас да медалларынан сыаналаммыта, Саха АССР Үрдүкү Советын Президиумун Бочуотунай грамотатынан бэлиэтэммитэ. Кини Саха Республикатын норуотун хаһаайыстыбатын үтүөлээх үлэһитэ.

Лыткин Н.Н. – Ньурба улууһун Бочуоттаах олохтооҕо. Кини төһө да сааһырдар, пенсияҕа да таҕыстар быар куустан олорбот. Кини киэҥник биллэр журналист, республика экономикатын, культуратын сайдыытыгар аналлаах темаларга сүүһүнэн дириҥ анализтардаах, олус интэриэһинэй ыстатыйалары суруйан республика хаһыаттарыгар тиһигин быспакка бэчээттэтэр. Өссө кини художественнай литератураҕа күүһүн холонон көрөр. «Бичик» кинигэ кыһатынан «Арыылааҕым дьоно» диэн бэрт интэриэһинэй романы суруйан саха ааҕааччыларыгар үчүгэй бэлэҕи оҥордо, 2015 сылга бэйэтин олоҕун, үлэтин туһунан кэпсиир диэн кинигэтэ бэчээттэнэн таҕыста.