Майкл Янг

Лорд Майкл Янг ( 09.08.1915 сыллаахха Манчестерга төрөөбүт — 14.01.2002 сыллаахха Лондоҥҥа өлбүт) — Улуу Британия социолога, уопсастыбаннай уонна бэлитиичэскэй диэйэтэлэ. Лортар Балааталарын чилиэнэ (1978—2002). Улуу Британия акадьыамыйатын бочуоттаах чилиэнэ (1995). 20.03.1978 сыллаахтан пэр (барон).

Майкл Янг 1950-1990 сыллардаахха аан дойдуга тµмэт урбаана сайдыытыгар сүҥкэн кылаатын киллэрбитэ. Кини туһунан Гарвард үнүбэрситиэтин бэрэпиэссэрэ Дэниэл Бэлл маннык этэн турар: “Аан дойдуга түмэт урбааныгар кини саҕа сайдыыны, көҕүлээһини киллэрбит киһи ахсааннаах буоллаҕа буолуо. Янг көмөтүнэн Аан дойду араас муннугар 60-тан тахса түмэт урбаанын тэрилтэлэрэ баар буоллулар. Ол иһигэр Улуу Британия сиригэр хас даҕаны түмэт урбаанын оскуолата тэрилиннэ”.

Биографията

Гибсон уонна Эдит Янгтар уоллара Лондоннааҕы экэниэмикэ оскуолатын бүтэрбитэ (билим бакалавра, 1938 с.). Эмиэ онно үөрэнэн 1963 сыллаахха ускуустуба магистрын аатын ылбыта, кэлин бөлөһүөпүйэ билимин дуоктара буолбута.

1933-1935 сыллардаахха солиситорскай фирмаҕа үлэлээбитэ. 1939 сыллаахтан барристердаабыта.

1941-1945 сыллардахха Лейбористар баартыйаларыгар бэлитиичэскэй уонна экэнэмиичэскэй былааннааһын салаатыгар дириэктэринэн, оттон 1945-1951 сыллардаахха чинчийэр департамен сэкирэтээринэн үлэлээбитэ.

1953 сыллардаахха Лондоннааҕы Уопсастыбаннай штудиялар үнүстүүттэрин тэрийбитэ уонна 2001 сыллаахха диэри салайбыта.

1961-1966 сыллардаахха Кембриджкэ үлэлээбитэ, 1961-1963 сыллардаахха эмиэ онно социология тиэмэтигэр лиэксийэ аахпыта. 1989-1992 сыллардаахха Лондоннааҕы үнүбэрсиэт Биркбегын бэрэсидьиэнинэн талыллан үлэлээбитэ.

Майкл Янг 2002 сыллаахха 86 сааһыгар олорон уһун ыарахан ыарыыттан ыалдьан өлбүт.

Үс төгүл ойохтоно сылдьыбыта, биэс оҕолоох.