Никифоров Георгий Максимович (1926-1977)
Никифоров Георгий Максимович (1926-1977) — биллиилээх ырыа айааччы[1].
Үөһээ Бүлүү улууһун Нам нэһилиэгэр 1926 сыллаахха төрөөбүтэ. Аҕа дойду улуу сэриитин кыттыылааҕа. Дьокуускайдааҕы культурнай-сырдатар училище байаан кууруһугар, муусука-уус-уран училищеҕа композитор Грант Григорян кылааһыгар үөрэммитэ. Өр сылларга Үөһээ Бүлүүтээҕи норуот айымньытын дьиэтин иһинэн үлэлиир музыкальнай-фольклорнай түмсүүнү салайбыта.
С. Тимофеев хоһоонугар "Эйэ-дьол иһин" диэн бастакы ырыатын айбыта ("Суох буоллун сэрии, Суох буоллун өлүү!"). Степан Дадаскинов либреттотыгар "Уот туһунан тойук" ортаорияны хос ааптар быһыытынан, оҕолорго Бүөтүр Тобуруокап остуоруйатыгар "Моруос оҕонньор" диэн операны композитор Л. Вишкаревтуун айбыта. "Саха сирэ ыллыыр" хомуурунньукка (1956 с.) хос ааптар быһыытынан үлэлэспитэ. Олоҕун уонна айар үлэтин туһунан "Ыра санаам ыллана туруо" (2006) кинигэ тахсыбыта[1].
Ырыаларын хомуурунньуга "Көтөн тахсыҥ, кыталыктар" (1995).