Петров Тимофей Иванович

Петров Тимофей Иванович — Ньурба оройуонун Бордоҥ нэһилиэгэр 1914 сыл тохсунньутугар дьадаҥы бааһынай кэргэнигэр төрөөбүтэ.

Кэтэхтэн үөрэнэн Н.Г.Чернышевскай аатынан Бүлүүтээҕи педагогическай училищены бүтэрэн, начальнай кылаастарга учуутал идэтин ылан, олоҕун бүүс-бүтүннүү кыра уонна орто саастаах оҕолору үөрэтиигэ, иитиигэр анаабыта. 1930 сыллаахха Ньимискиэннээх начальнай оскуолатын бүтэрэн, Кукаакы, онтон I Бордоҥ олохтоох Советтарын исполкомнарын секретарынан үлэтин саҕалаабыта. 1931-1932 сылларга Хатыы бөһүөлэгэр маҕаһыын продавеһынан-сэбиэдиссэйинэн үлэлээбитэ. Онтон 1932 сылтан 40-тан тахса сыл устата тохтобула суох Маалыкай оскуолатыгар начальнай кылаас учууталынан, военругунан, Хатыы оскуолатыгар сэбиэдиссэйинэн үлэлээбитэ.

ХХ үйэ отутус сыларыттан үйэ аҥаарын кэриҥэ бириэмэҕэ Тимофей Иванович Петров Хатыы, Маалыкай оскуолаларыгар 600-тэн тахса кыра саастаах оҕолору бастакы кылаастан бэһис кылааска диэри үөрэтэн-такайан билии-көрүү киэҥ аартыгар үктэннэрбит үтүө өҥөлөөх.

Кини илиитин иһинэн ааспыт оҕолортон кэлин сүүһүнэн учуонайдар, араас рангалаах салайар үлэһиттэр, учууталлар, врачтар, инженердэр, культура, искусство үлэһиттэрэ үүнэн тахсыбыттара

Кини учууталлыырын тас өттүгэр нэһилиэктэр общественнай-политическай олохторугар активнай кыттыыны ылара, олохтоох Советтарга депутатынан, исполкомнар чилиэннэринэн талыллан утумнаах үлэни ыытара.

Петров Тимофей иванович РСФСР үөрэҕириитин туйгуна буолбута, «Үлэҕэ туйгуну иһин», «В.И.Ленин төрөөбүтэ 100 сылынан. Килбиэннээх үлэтин иһин», «1941-1945 сс. Аҕа дойду сэриитигэр килбиэннээх үлэ иһин» мэтээл, «Үлэ ветерана» медалларынан наҕараадаламмыта, элбэх Бочуотунай грамотанан бэлиэтэммитэ, төрөөбүт-үөскээбит, уһуннук үлэлээбит Бордоҥун нэһилиэгин Бочуоттаах олохтооҕо буолбута.

Улууска норуот үөрэхтээһинин ситимин атаҕар турорууга, сайыннарыыга, норуот хаһаайыстыбатын салааларыгар араас идэлээх кадрдар көлүөнэлэрин иитэн таһаарыыга улахан үтүөлэрин сыаналаан, Ньурба улууһун Администрациятын баһылыгын 1994 сыл кулун тутар 22 күнүнээҕи 63 №-дээх уурааҕынан Тимофей Иванович Петров Ньурба улууһун Бочуоттаах олохтооҕо аата иҥэриллибитэ.