Седов Константин Сергеевич

Константин Сергеевич Седов (кулун тутар 24 күнүгэр 1981 сыллаахха төрөөбүт) — артыыс, клоун, “Балыыһа Клоуннара” автономнай кэмиэрчэскэйэ суох тэрилтэ уус-уран салайааччыта. “Чемодан бабочек” уонна “Знакомство с зимой” клоуннар испэктээктэригэр оонньообута.

Константин Седов Экэниэмикэ үрдүкү оскуолатын уонна ВГИК-кэ артыыстыыр маастарыстыба оскуолатын (“Парадокс” устуудьуйа-тыйаатыр) бүтэрбитэ.

Үлэтин-хамнаһын 2005 сыллаахха балыыһа клоунун быһыытынан саҕалаабыта. Ол курдук кини Арассыыйатааҕы оҕо килиниичэскэй балыыһатын (РДКБ) иһинэн үлэлиир Ыараханны ыалдьыбыт оҕолорго көмөлөһөр уопсастыбаннай аһымал пуонда волонтерун быһыытынан, РДКБ кылаабынай бырааһа Николай Николаевич Вагонов көҥүллээһининэн, ыалдьа сытар оҕолору киирэн сэргэхситэр буолбута. Киниэхэ үлэтигэр кэмиттэн кэмигэр устудьуоннааҕы сылларын доҕотторо кэлэн көмөлөһөр буолбуттара.

Седов ити курдук үс сыл устата үлэлээбитэ. Ол кэннэ быраастар уонна ыарыһах оҕолор төрөппүттэрэ клоунада оҕолор атахтарыгар туралларыгар, майгылара көнөрүгэр, уопсайынан, реабилитация түргэнник барарыгар көмөлөһөр эбит диэн санааҕа кэлбиттэрэ.

Онон сибээстээн ити кэмнэргэ Седов Швейцарияҕа баран “Theodora” диэн балыыһа клоуннарын тэрилтэтигэр үөрэнэн кэлбитэ уонна бэйэтэ эмиэ баҕалаах дьону клоуннуургу үөрэтэн барбыта.

2008 сыллаахха “Клоуннар оскуолаларын” бастакы хараҥаччылара тахсыбыттара. Эмиэ ити сыл РДКБ-га клоуннар бастайааннай сулууспара үлэтин саҕалаабыта.

2009-2010 сыллардаахха оскуолаҕа уопсайа 65 киһи кэлэн үөрэнэн салгыы бэйэлэрэ волонтердуу барбыттара.

2009 сыллаахха Седов “Доктор-клоун” диэн ыараханнык ыалдьыбыт оҕолорго көмөлөһөр оҥкуллаах кэмиэрчэскэйэ суох тэрилтэни тэриммитэ уонна идиэйэ ааптара, олоххо киллэрээччитэ буоларын быһыытынан, дириэктэр буолбута.

2010 сыл сайыныгар Константин Седов Арассыыйаҕа Франция култууратын сылын чэрчитинэн “Le Rire Médecin” (балыыһа клоуннарын тэрилтэтэ) тэрилтэ кэлэ сырыттаҕына икки нэдиэлэлээх маастар кылааска сылдьан баран, ол сыл күһүнүгэр үһүө буоланнар Парижка анаан стажировкалана бараллар.

Билигин Константин Седов хамаандата “Балыыһа Клоуннара” кэмиэрчэскэйэ суох тэрилтэни тэринэн үлэлии-хамсыы сылдьаллар.