Сибиир баҕата — Саха сирин киин улуустарыгар ордук элбэхтик көстөр сир-уу харамайа.

Кини уратыта — өрөҕөтүгэр кыһыл эбирдээх. Баҕалар атын көрүҥнэрэ элбэхтик саҥарар буоллахтарына бу баҕа саҥарбат.

Саас, ыам ыйыгар, кыра уулар сылыйдахтарына ыама саҕаланар. Тыһыта ууга үүнээйилэр умнастарын тула салахай курдук искэхтэрин эрийэн кэбиһэллэр. Сотору кэминэн уһун кутуруктаах, тас хайыылаах үөскэхтэр тахсаллар. Үөскэх улааттаҕын аайы кутуруга бэйэтин этигэр-сиинигэр тэҥнээтэххэ улам кыччаан иһэр, сиргэ тахсар кэмигэр отой да сүтэр.

Баҕа аһын ыйыстарыгар хараҕын халтаһатын былчыҥнара көмө буолаллар.