Такыров Прокопий Васильевич

Такыров Прокопий ВасильевичБүлүү оройуонун "Мастаах" сопхуос дириэктэрэ, Эдьигээн оройуоннааҕы сэбиэтин толорор кэмитиэтин бэрэстээтэлэ.

1932 сыл олунньу 23 күнүгэр Ньурба оройуонугар Кукаакы нэһилиэгэр төрөөбүтэ.

Аҕата Такыров Василий Егорович (1873 с.т.), ийэтэ Такырова Анна Денисовна (1891 с.т.) сүөһү ииттэн, хаһаайыстыба тэринэн олорбуттара, 1931 сылтан колхозтаах буолбуттара. 1939—1947 сылларга Прокопий Маалыкай ситэтэ суох орто оскуолатыгар үөрэммитэ, биир сыл «Победа» колхозка улэлээн баран, Ньурба орто оскуолатын 8-с кылааһын үөрэнэн бүтэрбитэ, онтон салгыы Ньурба бөһүалэгин культуратын дьиэтин счетоводунан, салгыы Кукаакы ааҕар балаҕанын сэбиэдиссэйинэн, үлэлээбитэ.

1951 сыл күһүнүгэр Дьокуускайдааҕы педрабфакка киирбитэ уонна 1953 сыллаахха бүтэрбитэ, ол сыл педннститукка киирэн үөрэҕин салҕаан 1957 сыллаахха Дьокуускайдааҕы государственнай университеты бүтэрэн, история учуугалын идэтин ылбыта. 1957 сыл атырдьах ыйыттан 1958 сыл муус устарга диэри Хатыы оскуолатыгар директордаабыта, онтон «Передовой отряд» колхоз комсомольскай тэрилтэтин босхоломмут секретарынан талыллыбыта, 1958 сын сэтинньи ыйыгар ЫБСЛКС Ньурба оройуонунааҕы комитетыгар инструкторынан сыҕарытыллыбыта.

1960 сыл тохсунньутуттан 1961 сыл алтынньыга диэри бастаан комсомол Ньурбатааҕы райкомун иккис, онтон бастакы секретарынан ситиһиилээхтик үлэлээбитэ. Итинтэн партийнай үлэҕэ барбыта: балтараа сыл партия Ньурбатааҕы райкомун партийнай үөрэхтээһинин кабинетын сэбиэдиссэйинэн үлэлээн иһэн «Хрущевскай оттепель» саҕана, түөрт Бүлүү оройуоннара холбоспут Бүлүүтээҕи колхознай-совхознай территориальнай управлениеларыгар 1962 сыл ыам ыйыттан 1963 сыл атырдьах ыйыгар диэри инспектор-тэрийээччинэн бэрт ситиһиилээхтик үлэлээбитэ, онтон салгыы 1963 сыл күһүнүгэр «Мастаах» совхоз (Бүлүү оройуона) Үгүлээттээҕи отделениетын управляющайынан анаммыта.

1967 сыл алтынньы 23 күнүнээҕи партия Саха Уобаластааҕы комитетын бюротун уурааҕынан (прот.№93 23.Х.67 с.) Прокопий Васильевич «Мастаах» совхоз директорынан ананар. Манна үлэлии сырыттаҕына, 1971 сыл от ыйын 14 күннээх партия обкомун бюротун уурааҕынан Хабаровскайдааҕы икки сыллаах үрдүкү партийнай оскуолаҕа ыытыллыбыта. Үөрэҕин бүтэрээтин кытта, 1973 сыл бэс ыйын 27 күнугэр Такыров Прокопий Васильевиһы үлэһиттэр депутаттарын Эдьигээн оройуоннааҕы советын ситэриилээх комитетын председателинэн талаллар. Бу улахан эппиэттээх дуоһунаска икки сыл үлэлээтин кытта, кинини өссө үрдүк дуоһунаска, - партия Эдьигээн оройуоннаады комитетын бастакы секретарынан, талаллар. Прокопий Васильевич бу үлэҕэ 1987 сыл бэс ыйын 2 күнүгэр пенсияҕа тахсыар диэри үлэлээбитэ.

Таб. Такыров П. В. оройуону салайар кэмигэр оройуон экономиката, культурата туруктаахтык сайдыбыта, үлэһиттэр, ордук табаһыттар, үлэлиир, олорор усулуобуйалара тупсубута, гражданскай авиация Хоту сир усулуобуйатыгар табыгастаахтык уонна таһаарылаахтык үлэлиир усулуобуйата баар буолта.

Прокопий Васильевич партийнай, советский уонна хаһаайыстыбаннай үлэлэргэ дириҥник хорутан толкуйдуур, бэйэтигэр уонна атыттарга үрдүк ирдэбиллээх, принципиальнай салайааччы быһыытынан биллибитэ. Кини үлэҕэ-хамнаска, олоххо үрдүк ирдэбиллээх буолуу уонна саҕалаабыт дьыаланы тиһэҕэр тиэрдии үтүө холобурун көрдөрөрө. Прокопий Васильевич Такыров үтүө сүбэһит, бастыҥ лектор, пропагандист, активнай позициялаах общественник этэ. Бүлүү, Эдьигээн оройуоннарыгар хастыы да төгүл оройуон советын депутатынан, партия райкомун пленумун, бюротун чилиэнинэн уонна партия Саха уобаластааҕы комитетын чилиэнинэн талылла сылдьыбыта. Дойдутун, норуотун иннигэр үтүөҕэ-өҥтө «Бочуот Знага» орденынан, элбэх медалларынан бэлиэтэммитэ.