Турсункулов Калаубек Кудайбергенович

Турсункулов Калаубек Кудайбергенович — казаах суруйааччыта.

Турсункулов Калаубек Кудайбергенович Чимкенскэй уобалас Ленинскэй оройуонугар Шарбулат диэн сэлиэнньэҕэ 1934 сыллаахха төрөөбүтэ. 1957 сыллаахха Кызылорда куоракка баар педагогическай институту ситиһиилээхтик үөрэнэн бүтэрбитэ.

Казах норуотун биллиилээх суруйааччыта Калаубек Турсункулов «Пароль: «Здравствуй, Якутия!» арамаан – эссени суруйбута. Калаубек Кудайбергенович саха суруйааччыларын улуу доҕордоро – атастара буолбута ырааппыт. Хардары-таары ыалдьыттаһаллар, сылдьыһаллар. Саха народнай суруйааччыта Иван Федосеев ахтыытыттан: «1979 сыллаахха сайын Саха сиригэр Казахстан суруйааччыларын сойууһун бырабылыанньатынан сэкирэтээрэ Калаубек Турсункулов кэлэ сылдьыбыта. Онно кини: «Эһиил Саха литературатын Күннэрин Казахстаҥҥа ыытыахпыт», - диэбитэ. Ол саҥата сүтэ илигинэ, «Толору томтоһуйар Лена», «Тайҕа суугуна» диэн саха суруйааччыларын айымньыларын  икки томун поэзия уонна проза антологияларын оҥорон,  казахтыы тылынан таһаара оҕустулар. Үс хонук иһигэр «Биһиги ыалдьыттарбыт» диэн буклеты таһаарбыттар. Дьэ итиэннэ Саха литературатын Күннэрин ахтыах-саныах курдук тэрийдилэр...» Манан И.Федосеев аймахтарбыт, казахтар сайдыыларын, эппит тылларыгар турар үтүө доҕордуу сыһыаннаахтарын бэлиэтиир.

“Саха сирин уонна Казахстан литератураларын доҕордоһууларын төрүттэспит, саха суруйааччыларын чугас доҕордоро,  кэлин Республика культуратын үтүөлээх үлэһитин аата иҥэриллибит Калаубек Турсункулов айымньылара олохтоох кинигэ издательствотыгар хас да төгүллээн бэчээттэнэн, киэҥ сэҥээриини ылбыттара: «Үтүө да күн этэ»  - сэһэннэр, сахалыы тылынан, 1981 с. “Здравствуй, Якутия” эссе-роман, 1984 с “Сардана и тюльпан” эссе-роман нууччалыы тылынан тылбаастаабыттара” – диэн суруйар Дмитрий Кириллин “Литературалар доҕордоһуулара, хардарыта байытыһыылара” диэн ыстатыйатыгар.

Саха Өрөспүүбүлүкэтин Президенин 736 №-дээх  Ыйааҕынан 1994 сыллаахха кулун тутар 11 күнүгэр Турсункулов Калаубек Кудайбергеновичка А.Е.Кулаковскай аатынан С.Ө. Судаарыстыбаннай бириэмийэтин лауреатын аата иҥэриллибитэ.

Калаубек Турсункулов айар үлэтэ, очеркалара. сэһэннэрэ аан дойду бары муннуктарыгар араас омук тылынан интернет маҕаһыыннарынан тарҕанан, биһирэнэн, ааҕааччылар сыанабылларын, ытыктабылларын ылбыта.

Туһаныллыбыт литература:

1. Иван Федосеев. Көрсүһүүлэр уонна санаалар. Хотугу сулус. 1980.

2. Дмитрий Кириллин. Литературалар доҕордоһуулара, хардарыта байытыһыылара. Чолбон. 2000, №12

3. Интэрниэт ситимиттэн.