1941-1945 сыллардааҕы Аҕа дойду сэриитигэр бырааттыы Захаровтар кыттыылара

Чурапчы улууһун Кытаанах нэһилиэгин холкуостаах ыалын Иннокентий Егорович уонна Марфа Николаевна Захаровтартан Аҕа дойдуну көмүскүүр улуу сэриигэ 3 уоллара ыҥырыллан барбыттара.

Уйбаан

Улахан уол, Захаров Иван Иннокентьевич 1910 сыл төрүөх, 16 сааһыгар бастакы кылааска үөрэнэ киирбитэ, начальнай оскуоланы бүтэрэн баран комсомол ыччатын оскуолатыгар үөрэммитэ. 1931-1932 сылларга тыа хаһаайыстыбатын техникумугар үөрэммитэ. Сэрии иннинэ 1932-1941 сылларга тыаҕа учууталынан үлэлээбитэ. Уйбаан 1941 сыл бэс ыйын 27 күнүгэр сэрии саҕаламмытыгар тута ыҥырыллыбыта. Бастакы уот сэриигэ сүрэхтэниитин Тихвин куорат анныгар барбыта. Бу сэриигэ илиитигэр бааһыран госпитальга киирбитэ. Үтүөрэн баран фроҥҥа төннүбүтэ. 1943 сыл кыһыныгар, Ладога күөл соҕуруу биэрэгин босхолооһун иһин, кыргыһыыга төбөтүгэр улаханнык бааһырбыта, ол эрэн инники кирбиигэ сэриилэһэрин тохтоппотоҕо. 1943 сыл сайыныгар, Волховскай фроҥҥа Новгород куорат анныгар кыргыһыыга атахха ыараханнык бааһыран инбэлиит буолбута. 1944 сыллаахха дойдутугар баттыктаах төннөн кэлбитэ. Төннөн кэлэн баран Чурапчы оройуонугар араас салайар дуоһунастарга үлэлээбитэ. 1957 сыллаахха дьиэ кэргэнинэн Аллараа Бэстээх бөһүөлэгэр көһөн, маҥнай лесхозка, онтон бөһүөлэк сэбиэтин бэрэссэдээтэлинэн талыллыбыта уонна хас да ыҥырыыга талыллан, бочуоттаах сынньалаҥҥа тахсыар диэри үлэлээбитэ. Соҕотох уол оҕолооҕуттан Иван Иванович Захаровтан үс сиэннээх, 4 хос сиэннээх.

Наҕараадалара

«За Отвагу», «За Победу над Германией» мэтээллэринэн, «Аҕа дойду улуу сэриитэ» уордьанынан, «Участнику войны» 20, 30 сылларынан үбүлүөйдээх мэтээллэринэн, «50 лет ВС СССР», «60 лет СССР», «Ветеран труда» мэтээллэринэн наҕараадаламмыта.

Дьөгүөр

Орто уол Захаров Егор Иннокентьевич 1912 сыллаах төрүөх, үөрэҕэ суох колхуостаах. Олус көнө, улэһит киһи этэ. Фроҥҥа 1942 сыллаахха ыҥырыллан барбыта. Ленинград куорат анныгар бастакытын уоттаах сэриигэ киирбитэ. 1943 сыллаахха, кыргыһыы кэмигэр аттыгар миинэ эстэн, Дьөгүөр ыараханнык бааһырбыта... 1943 сыл сэтинньи 10 кунугэр сырдык олоҕо быстыбыта. Псковскай уобалас Невельскэй оройуонун Урыче сэлиэнньэтигэр баар братскай могилаҕа көмүллүбүтэ. Кэргэнинээн Елена Гаврильевналыын биир соҕотох кыыстаахтар Елена Егоровна Захарова диэн. Елена Егоровна 5 кыыс оҕолоох, 14 сиэннээх, элбэх хос сиэннээх. Огдообото Елена Гавриловна Чурапчы сэлиэнньэтигэр олорбута. 2015 сыл бэс ыйыгар 100 сааһын туолан, бу дьыл күһүнүгэр бу сиртэн күрэммитэ.

Ньукулай

Кыра уол, мин хос эһэм, Захаров Николай Иннокентьевич 1916 сыллаах төрүөх, сэрии иннинэ «Кыһыл иитиэх» колхуос бырабылыанньатын бэрэстээтэлинэн үлэлээбитэ. Фроҥҥа убайын Иван Иннокентьевиһы кытта бэс ыйын 27 күнүгэр 1941 сыллаахха ынырыллан барбыта. 1942 сыл тохсунньутугар дылы убайдыы бырааттыылар бииргэ хорсуннук сэриилэспиттэрэ. Ленинград куорат анныгар ыарахан сэриилэр кэмнэригэр, иккиэннэрин араартаан Ньукулай 168 танковай биригээдэ автоматчиктар роталарын байыаһа буолбута. 1942 сыл муус устар 12 күнүгэр Ленинградскай уобалас Кандуева дэриэбинэ иһин кыргыһыыга уна атаҕар улаханнык бааһырбыта. Өр кэмҥэ госпитальга эмтэнэн баран, күһүн дойдутугар төннөн кэлбитэ. Төннөн кэлэн баран Чурапчы улууһугар, төрөөбүт нэһилиэгэр араас салайар үлэлэргэ үлэлээбитэ. 1970 сыллаахха, сэриигэ ылбыт бааһырыыларын содулларыттан, өлбүтэ. Кини кэнниттэн 6 кыыс оҕо хаалбыта. Галина, мин эбээм, улахан кыыһа. онтон Февралина, Анна, Александра, Марфа, Татьяна. Кини 15 сиэннээх, 20 хос сиэннээх.

Наҕараадалара

«За Победу над Германией» мэтээлинэн, «20 лет победы в ВОВ», «50 лет Вооруженных сил СССР» үбүлүөйдээх мэтээллэринэн наҕараадаламмыта.