Горелов Вячеслав Валентинович

Вячесла́в Валенти́нович Горе́лов (муус устар 5 күнүгэр 1955 сыллаахха Пермь куоракка төрөөбүт) – нуучча түмэт урбаанньыта, “Фермердэр оскуолалара” эрэгийиэннээҕи уопсастыбаннай тэрилтэ төрүттээччитэ. Тэрилтэ биирдиилээн дьону уонна ыччаты агро-биисинэскэ сыһыарар тосхоллоох үлэлиир.

Биографията уларыт

Вячеслав Валентинович Горелов 1955 сыллаахха муус устар 5 күнүгэр Пермь куоракка төрөөбүт. Перимнээҕи судаарыстыбаннай педогогическай үнүбэрситиэт Биологияҕа факультетын бүтэрбит. Бүтэрэн баран орто оскуолаҕа биология уонна айылҕа үөрэҕин учууталынан үлэлээбит. Өр кэм устата оҕо дьиэлэрин иитиллээччилэрин, выпускниктарын, доруобуйаларыгар хааччахтаах тулаайах оҕолору, хаайыыттан тахсыбыт эдэр ыччаты ииппит-үөрэппит, кинилэри тыа хаһаайыстыбатын урбааныгар сыһыарарга, бэйэ дьыалатын саҕалыырга үлэлэспит, үлэ, дьиэ-уот булуналларыгар көмөлөспүт.

Горелов түмэт урбаанынан 2000 сыллаахтан саҕалаан дьарыктаммыт уонна ол сыл Перьм кыраайын Ильинскэй оройуонун Кривец дэриэбинэтигэр балыксыттар сынньанар дьиэлэрин туппут.

2001 сыллаахтан “Седой Урал” Пермский клуб” РОО вице-эрэсидьиэнэ. 2003 сыллаахха тулаайах оҕолорго анаан лааҕыр арыйан үлэлэппит. Эмиэ ити сылтан саҕалаан “Биһиги кэскилбит” пуонда салайааччыта Вагит Алекперовы кытары билсэн доҕордоспут уонна ол түмүгэр 2009 сыллаахха “Фермердэр оскуолаларын” арыйбыт.

2004 сылтан саҕалаан Вячеслав Валентинович аһымал бырайыактарын олоххо киллэрэн барбыта. Ол курдук кини уустук иитиилээх обургу оҕолору, оҕо дьиэтин иитиллээччилэрин тыа хаһаайыстыбатыгар сыһыарар, үлэнэн иитэр сыаллаах. Ол түмүгэр 34 араас таһымнаах бырайыак олоххо киирэн үлэлии турар. Билиҥҥи туругунан Горелов 100 киһини хабар ураты социальнай-экологическай комплекстаах. Компекс иһигэр киирэр: 16 миэстэлээх уопсастыбаннай социальнай көстүүнэн, кыһыҥҥы тэпэлииссэлээх 2 үөрэтэр-көрдөрөр пиэрмэ, бары тэрилинэн толору хааччылыбыт үөрэнэр кылаас.

Итини таһынан Горелов “Газпром” тэрилтэ уонна Ыччат дьыалатыгар федеральнай ааҕыныстыба көҕүлээһиннэринэн Астрахань уобалаһыгар тэриллибит “СелиАс 2012” сугулааҥҥа анал лиэксийэлэри аахпыта.

В.В. Горелов “Дьоҕус урбаан лиидэрэ-2004” куонкурус лауреата, “Урал уонна Сибиир көмүс пуондата” бириэмийэ “Дьиэ кэргэн биисинэһэ” номинациятын хаһаайына.