Иванов Фёдор Романович

Иванов Федор Романович Хайахсыт нэһилиэгин олохтоохторо Иванов Роман Гаврильевич, Иванова Варвара Егоровна улахан уоллара Иванов Федор Романович 1937 сыллаахха Хайахсыт нэһилиэгэр төрөөбүтэ. 5 саастааҕар Хоту көһөрүллүүгэ ийэтин Варвараны кытта барбыт. Онон Федор Романович Хоту көһөрүллүү кыттыылааҕа. Көһөрүллүүттэн кэлэн баран Хайахсыт 7 кылаастаах оскуолатыгар үөрэнэ киирэр. Начальнай кылааска Уорҕаҕа үөрэммит.

Хайахсыт сэттэ кылаастаах оскуолатын бүтэрэн, 1954-55 сс. Дириҥ оскуолатыгар үөрэнэ кэлэр. Онус кылааһы 1957 сыллаахха бүтэрэн, комсомол путевкатынан «Оскуола – производство – үрдүк үөрэх» дэвиһинэн, төрөөбүт холкуоһугар бастаан суотчутунан, онтон бөдөҥсүбүт Эрилик Эристиин холкуос «Мэлдьэхсититээҕи» учаастагар солбуйар биригэдьииринэн үлэлиир. Кини үлэлиир кэмигэр «Тапталлаах» ыччат фермата үүтү ыаһына 2000 лиитирэ кирбиини ылбыта. Үлэлиир сылларыгар ыччаты кытта сибээһи тутуһара, тылын ылыннарар салайааччы быһыытынан биллибитэ. Ол иһин кинини Улахан Эрилик саҕана Бахсыга Биригэдьииринэн анааннар үлэлэтэ ыыппыттара.

Cалгыы 1961 сыллаахха Чурапчы орто оскуолатын базатыгар XI педагогическай кылааска үөрэнэн, начальнай кылаас учууталын идэтин ылар. Чакыр начальнай оскуолатыгар учууталлыыр, бу оскуолаҕа сэбиэдэссэйинэн үлэлиир. Ити кэмнэргэ оройуон ыччатын биир санааҕа түмэн, ыччат лидерэ буолар.

1965 сыллаахха күһүн, атырдьах ыйыгар Федоры кытта ыал буолбута .

Иванов Федор Романович төһө да үлэ үөһүгэр сырыттар, СГУ историческай факультетын бүтэрэн, историк специальноһын ылбыта. Онон 4 сыл тухары Чурапчытааҕы ыччат киэһээҥҥи оскуолатыгар директорынан үлэлээбитэ.

1971-1975 сс. Хайахсыт орто оскуолатыгар ананан директорынан үлэлиир. Бастаан Хайахсыкка үлэлии тахсарбытыгар, эргэ умайбыт оскуолаҕа үлэлээбиттэрэ.

Саҥа корпус үлэтэ киириитигэр, оскуола коллектива, техническэй үлэһиттэр, нэһилиэнньэ олохтоохторо бары активнай кыттыыны ылбыппыт.

Федор Романович нэһилиэк олоҕор активнайдык кыттара, ол курдук исполком чилиэнэ, партийнай тэрилтэ секретара, пропагандист. Зонанан үлэни нэһилиэккэ иилээн-саҕалаан улэлэтэрэ. Салайааччы быһыытынан ирдэбиллээх, эппитин толорторор буолан, дьон-сэргэ ытыктабылын ылбыта. Кини куруутун үөрэ-көтө, кэпсии-ипсии сылдьара, дьону сыаналыыр, кими да куһаҕан үлэһит диэбэт, киһиэхэ барытыгар биир тэҥ сыһыаннааҕа.

Дьиэ кэргэҥҥэ, оҕолоругар эйэҕэс сыһыаннаах, бииргэ төрөөбүттэрин, балтыларын, бырааттарын олус таптыыра, куруутун сыллыы сылдьара. Киһиэхэ барытыгар үчүгэйи эрэ баҕарара.

Эбээм Сүөдэрдиин 10 эрэ сыл наһаа эйэлээхтик, дьоллоохтук олорбуппут, кини 38 эрэ сааһыгар олохтон барбыта. 1975 сыллаахха 3 оҕо аҕата суох хаалбыта. Түрөөбүт дойдутун олус күүскэ таптыыра, элбэх былааннардах этэ.