Игнатьев Кирилл Афанасьевич

Игнатьев Кирилл Афанасьевич (1918—1983) — Өлөөн удьор табаhыта, үлэҕэ Албан аат III степеннээх орденын кавалера.

Игнатьев К. А. — бэрт кыра сааhыттан көс дьон ортотугар улааппыт буолан, таба иитиитин ымпыгын-чымпыгын билэр эдэр киhини, биригэдьииринэн аныыллар. Кини колхознай-совхознай тутуу саҕана таба иитиитигэр биир бастыҥ үлэлээх биригэдьииринэн буолар. Ол курдук кини 1961 сылтан, «Өлөөн» совхоз тэриллиэҕиттэн, Дьэлиҥдэ отделениетын 1-кы нүөмэрдээх табаны иитер ыстаада биригэдьииринэн пенсияҕа тахсыар диэри, бастыҥ үлэлээх коммунист биригэдьииринэн буолара.

Кирилл Афанасьевич биригээдэтэ IX пятилетка сылларыгар улахан табаны иитиини 96 %, тугуту тыыннаахтыы иитиини 83 % туһэрбэтэҕэ, государствоҕа эти 98-99 % орто уонна ортону үрдүнэн уойуулааҕа туттарара. Итинник таһаарыылаах үлэтин бэлиэтээн 1975 с. кини «Үлэҕэ Албан аат» III степеннээх орденынан наҕараадаламмыта, социалистическай куоталаһыы кыайыылааҕынан хас да төгүл буолбута, БСТХБ хас да төгүл кыттыылааҕа, элбэх юбилейнай медалларынан, бочуотунай грамоталарынан наҕараадаламмыта.

Төһө да тыаҕа-табаҕа улэлээбитин иһин, нэһилиэгэр биир бастыҥ активист-общественник быһыытынан биллэрэ, нэһилиэкэ, оройуоҥҥа депутатынан талыллара. Эдэр ыччаты иитиигэ, үлэҕэ угуйууга ахсаабат кыһамньытын уурара, элбэх оҕолоох амарах аҕа этэ.

Кини бииргэ үлэлээбит, угуйбут эдэр ыччаттара Спиридонов А. Х., Сергеев И. С. Николаев И. Н. Лганов В. Е., онтон да атыттар опыттаах табаһыт, биригэдьиир буолан оройуоҥҥа, республикаҕа тиийэ биллэр чемпион табаһыт аатын ылбыттара, орденнарынан, медалларынан, Бочуотунай грамоталарынан наҕараадаламмыттара.

Кирилл Афанасьевич кэлин пенсияҕа да тахсан баран, таба иитиитигэр наставник быһыытынан үлэлээбитэ, төһө да сааһырдар ырыган, ыарыһан, быраактаммыт табалары эбии аһатан, көрөн-харайан, уотан, таба ыйааһынын улаатыннарыыга, үрдүк хаачыстыбалаах эмис эти государствоҕа туттарыыга бастыҥ үлэлээх, уотуу ыстаадатынбиригэдьииринэн буолара. Кини олоҕун бүтэһик сылыгар диэри таба иитиитигэр доруобуйатын да харыстаммакка үлэлээбит оройуон биир бастыҥ үлэлээх табаһыта этэ.

В. А. Христофоров ыстатыйатыттан.