Кириллин Николай Дмитриевич

Кириллин Николай Дмитриевич - Саха сирин уопсастыбаннай диэйэтэлэ, геология-минералогия ноуукаларын хандьыдаата, СӨ үтүөлээх геолога.

1973 сыллаахха геолог идэтин Саха судаарыстыбаннай университетыгар ылбыта, 1997 сыллаахха экономист-менеджер үөрэҕин Арассыыйа судаарыстыбаннай сулууспатын академиятыгар бүтэрбитэ.

Үөһээ Дьааҥыга, Өлүөнэ Алдан ыккардыларыгар (Алдан антиклизата), Приморскай хапталга уонна Халыматааҕы көтөҕүүгэ (поднятие) сүүрбэ сыл устата геология чинчийиитин ыыппыта. 1991 сыллаахтан геологияны, промышленноһьы салайар үлэҕэ сылдьар. СӨ Геологияҕа судаарыстыбаннай кэмитиэтин тэрийиини 1993 сыллаахха көҕүлээччи уонна тэрийсээччи.

"Аллараа-Өлүөнэтээҕи" (1994) уонна "Анаабыр Алмаастара" (1997) кыырпах алмаас хостуур хампаанньалары тэрийиигэ кыттыбыта. Хас да сокуон бырайыактарын суруйсубута, ол иһигэр Саха ССР "О недрах и недропользовании" (1991) уонна СӨ "О регулировании пользования и распоряжения особым природным ресурсом - ископаемыми остатками мамонтовой фауны" (2005) уонна да атын СӨ уонна кини олохтоохторун сиртэн хостонор баайыгар бырааптарын көмүскүүр сокуоннар уонна нормативнай аакталар ааптардара.

1994 сылтан "О недрах" РФ сокуонун Госудуумаҕа ырытааччы уонна эспиэр. Геологияҕа уонна айылҕа баайын туһаныыга элбэх ноуучунай ыстатыйалары суруйбута.

Саха омугун кэнгириэһин уонна Саха уопсастыбаннай Киин Сүрүннүүр Сүбэлэригэр киирэр.

"Ископаемая мамонтовая кость-особый природный ресурс Севера России: проблемы права, экономики и организация рационального пользования" (2011), "Федерализм и недра"(2012) кинигэлэр ааптардара.