Максимова Виктория Николаевна
Максимова Виктория Николаевна — Саха тэлэбиидэнньэтин бастакы дииктэрдэриттэн биирдэстэрэ.
1946 сыллаахха ыам ыйын 11 күнүгэр Ытык Күөлгэ төрөөбүт (чопчулуурга). Виктория диэн ааты соторутааҕыта ситиһиллибит кыайыы чиэһигэр биэрбиттэр. Дьоно: ийэтэ Аграфена Михайловна Бочонина (Чөркөөхтөн, Төрүттэн төрүттээх), сэрии кэмигэр таһаҕас тиэйэр массыынаҕа суоппар, аҕата Николай Алексеевич Максимов, Чурапчыттан төрүттээх, сэрии кэмигэр Ытык Күөлгэ ДОСААФ-ка үлэлээбит, сэрии бүтүүтүгэр холбоспуттар. Эр киһи бастакы кэргэниттэн кыыстаах эбит (Хотуттан кэлэн иһэн борокуокка төрөөрү өлбүт), оттон дьахтар сэрии кэмигэр тулаайах хаалбыт тастыҥ кыра балтын ииттэ ылбыт.
Онтон ыал хоту көспүттэр, бастаан Күһүүргэ, онтон Быков Мыска олорбуттар. Виктория бииргэ төрөөбүт балта Людмила Быков Мыска олордохторуна төрөөбүт. Аҕалара кыыһа Виктория биэс саастааҕар өлбүт. Аҕатын бүтэһик үлэтэ "Арктика" диэн балыксыттар артыалларыгар бэрэстээтэл. Ийэтэ кыра оҕолорун аһатаары таһаҕас тиэйэр массыынаҕа суоппардыыр, түүнүн архыып паапкаларын тигэр эбит. Кэлин иистэнэр буолбут. Онтон дойдутугар Тааттаҕа көспүттэр, биир сыл Ытык Күөлгэ, онтон Чөркөөххө олобуттар. 1956 сыллаахха ийэтэ иккистээн үс кыра оҕолоох киһиэхэ кэргэн тахсыбыт[1].
Виктория Чөркөөххө 6 кылааска диэри үөрэммит, онтон Ытык Күөл оскуолатыгар. Орто оскуоланы бүтэрэн баран Дьокуускайга культпросвет училищеҕа үөрэммит.
Бу үөрэнэ сырыттаҕына (?) Мария Ивановна Бучугасова-Федорова диэн "Пионерскай саһарҕа" биэрии эрэдээктэрэ биэриитигэр кытыннарар буолбут.
Ону бэлиэтии көрөннөр тэлэбиидэнньэҕэ 17 саастааҕар 1965 сыллаахха үлэҕэ ыҥырбыттар. 70-с сылларга Москубатааҕы култуура институтугар үөрэммит, "режиссер" идэтин баһылаабыт. Саха тэлэбиидэнньэтигэр 1998 сыллаахха диэри үлэлээбит. Онтон 2001 сыллаахха диэри араадьыйаҕа үлэлээбит, ыараханнык ыалдьан тохтообут. 2008 сыллаахха кэргэнэ өлбүт, бэйэтэ инсуллаан инбэлиит буолбут. Онтон Капитоновкаҕа инбэлииттэр дьиэлэригэр олорбут.
2011 сыл сэтинньи 26 күнүгэр өлбүт[2].