Павлова Анна Петровна

Павлова Анна Петровна, бэс ыйын 10 күнүгэр 1939 сылаахха Сунтаар оройуонун Үөһээ Мэйик нэһилиэгэр төрөөбүтэ. Саха АССР үтүөлээх учуутала, РСФСР үөрэҕириитин туйгуна, Саха Өрөспүүблүкэтин учууталларын учууталлара, «Саха-Азия» пуонда стипендиата. Сунтаардааҕы 1-кы №-дээх оскуолаҕа уонна Сунтаардааҕы политехническэй лицейга химия учуутала.

Олоҕун олуктара

Бэс ыйын 10 күнүгэр 1939 сылаахха Сунтаар оройуонун Үөһээ Мэйик нэһилиэгэр төрөөбүтэ. 1958 с. Тойбохой орто оскуолатын бүтэрбитэ. Салгыы 6 сыл иитээччинэн уонна учууталынан үлэлээбитэ. 1969 с. СГУ биология-география факультетын бүтэрэн, Сунтаар бастакы нүөмэрдээх оскуолатыгар дириэктэри солбуйааччынан үлэлээбитэ. 1993 сылтан Сунтаардааҕы политехническэй лицейгэ химия учууталынан көһөрүллүбүтэ. Анна Петровна бастаан үлэлиэҕиттэн уруок тэрээһинигэр ураты суолтаны биэрэрэ, хас биирдии уруокка уһулуччу кичэйэн бэлэмнэнэрэ. Программалаах матырыйаалы наука-техника билиҥҥи ситиһиилэрин кытары ыкса сибээстиирэ, үөрэнээччилэр интэриэстэрин үрдэтэргэ, дириҥэтэн үөрэтиигэ ыҥырара. 1984 сылтан Анна Петровна СГУ устудьуоннарыгар бэйэтин предметигэр актыыбынай практиканы салайбыта. 1-кы №-дээх оскуолаҕа уонна лицейгэ естественнэй наукалар кафедраларын салайбыта.

Анна Петровна үөрэтэн таһаарбыт оҕолоруттан 34 киһи биолог-химик үөрэҕин ылбыттара, кинилэртэн 17 химия учууталлара. Лицейгэ үөрэтэн таһаартаабыт оҕолоруттан үрдүк үөрэх заведениеларыгар киирбиттэрэ: мединститукка 39, биолог идэтигэр 11, химик идэтигэр 14, химик-технолог идэтигэр 14. Анна Петровна үөрэтэр предметигэр кэнники 10 сыл устатыгар үөрэҕин ситиспэтэх оҕо диэн суоҕа, оҕо 80-90% «4», «5» сыаналарга үөрэниилэрэ ситиһиллибитэ.

Павлова А.П. старшай учуутал, учууталлар учууталлара, «Саха-Азия» пуонда стипендиата, Сорос стипендиата, оройуон чулуу үлэһитэ.

Наҕараадалара уонна ытык ааттара

Саха АССР үтүөлээх учуутала.
РСФСР үөрэҕириитин туйгуна.
Саха Өрөспүүблүкэтин Учууталларын учууталлара.
«Саха-Азия» пуонда стипендиата.

Сигэлэр

Педагогическая энциклопедия / М-во образования Респ. Саха (Якутия) ; [науч. ред.: Михайлова М. Г. д.п.н., проф ЯГУ, Петрова С. М. д.п.н., проф. ЯГУ ; сост. Иванова В. С.]. - Якутск, Т. 1. - 2000. - 323 с.
Кыайыыны, олоҕу уһансыбыттара: Сунтаар улууһун бочуоттаах уонна үтүөлээх үлэһит дьоно / хомуйан оҥордулар Н.Н.Спиридонов, А.К.Васильев; эп.эрэд.: Т.Н.Иванова уо.д.а. – Дьокуускай : Чопчу, 2020. 464 с. (244 c)