Сенькин Петр Егорович

Петр Егорович Сенькин — Серов аатынан холкуос бэрэстээтэлэ, Аҕа дойду Улуу сэриитин кыттыылааҕа.

1917 сыллаахха Таатта улууhугар I Дьохсоҕон нэһилиэгэр төрөөбүтэ. Чөркөөх сэттэ кылаастаах оскуолатын бүтэрбитэ. Оччотооҕу үүнэр көлүөнэ социализм акылаатын түһэрсэр, культурнай революцияны оҥорсор, колхозтары тэрийсэр улэҕэ актыыбынайдык кыттара, Петр да оччотооҕу бэйэтин сааскылаахтарыттан хаалсыбатаҕа. Комсомолга холбоспута, коммунистическай идеяҕа бас бэриммитэ, культурнай революция актыбыыһа буолбута. 1939 сыллаахха саас, Петр Сенькин Серов аатынан колхоз бырабылыанньатын председателинэн быыбардаммыта.

1941 сыл бэс ыйын бүтэһик күннэрэ. Колхозка партия райкомун инструктора тахсыбыта. "Сэрии буолбут, Гитлер эйэ дуогабарын кэhэн, сэриинэн түспүт" диэн хомолтолоох сурах бөһүөлэги тилийэ сүүрбүтэ. Ол күн колхозтаахтары мунньан миитин буолбута. Колхозтаахтар биир санаанан Ийэ дойдуну көмүскүүргэ хаһан баҕарар бэлэмнэрин биллэрбитэ. Оччотооҕуга коммунистическай пропаганда оннук күүстээх этэ. Хонуутааҕы отууларга, фермаларга кэпсэтии эрэ сэрии туьунан буолбута. Оройуонтан тахсар боломуочунайдар сэрии хаамыытын туһунан кэпсииллэрэ. Байыаннай эбээһинэс, учуот олохтонон, колхозтаахтар социалистическай Ийэ дойдуларын комускуу барыахтаахтара биллэрэ.

Окко киирии буолбута. Атырдьах ыйын саҥатыгар Петр Сенькин Уулаах куруо диэн сиргэ отчуттарга сырыттаҕына, Совет наарыһынайа тиийэн кэлбитэ. Кини председательгэ уонна да атын колхозтаахтарга армияҕа барар бастыкы бэбиэскэлэри туттартаабыта.

Ити курдук 1941 сыл атырдьах ыйын 10 күнүгэр Петр Сенькин колхозтаахтарын: Софрон Попову, Николай Слепцову, Петр Ключинскайы, Иннокентий Макаровы, Лука Большакову кытта ытык сэриигэ аттаммыта. Ити бастакы ыҥырыыга Таатта оройуонуттан 140-ча киьи барбыта.