Поздеева Нина Васильевна

Поздеева Нина Васильевна Кировскай уобалас, Нема диэн сэлиэнньэтигэр 1928 с. тохсунньу 29 кунугэр колхозтаах бааһынай дьиэ кэргэнигэр төрөөбүт, омугунан нуучча. Аҕата Поздеев Василий Николаевич икки сэрии кыттыылааҕа, ийэтэ аҕыйах кылаас үөрэхтээх боростуой үлэһит. Бииргэ төрөөбүттэрэ үһүөлэр, Нина саамай улаханнара.

1946 с. Молотовскай фельдшерско-акушерскай оскуоланы бүтэрэн баран, ол саҕана партия уонна правительство политикатын ылынан, Саха сиригэр үлэлии ананан кэлэр. Ньурбаҕа кэлбитин кэннэ Нина Васильевнаны Малдьаҕарга лесной оскуолаҕа сэллигинэн ыалдьар оҕолору эмтиир фельдшеринэн аныыллар. Онтон 2 сыл үлэлээн баран, 1948 с. Маалыкайга үлэлии кэлэр, манна кини фельдшерскэй-акушерскай пуун сэбиэдиссэйинэн үлэлиир. Оччолорго дьон үксэ алаастарынан, үрэх бастарынан тарҕанан олороро. Бырааьы ыҥырдахтарына (вызовка) Нина Васильевна түүнү-күнүһү билиммэккэ, утуйар уутун умнан туран, ыарыһахха тиийэрэ, атынан, ардыгар оҕуһунан, табанан айанныыра.

Сытыары сымнаҕас майгылаах, боростуой дьоҥҥо истиҥ сыһыаннаах буолан дьон-сэргэ ытыктабылын ылбыта. Нина Васильевна үлэлээбитэ иккис сылыгар сахалыы кэпсэтэр буолбута.

Нина Васильевна үлэтин үрдүктүк сыаналаан "Аҕа дойдуну көмүскүүр Улуу сэрии 1941-1945 сс. килбиэннээх үлэтин иһин", "В.И.Ленин төрөөбүтэ 100 сыла туолуутун бэлиэтээн. Килбиэнээх үлэтин иһин мэтээллэринэн, "Социалистическай куоталаһыы кыайыылааҕа" бэлиэннэн, оройуон, республика салалталарын махтал суруктарынан, бочуотунай грамоталарынан наҕараадалыммыта.

Поздеева Нина Васильевна кыыһа Васильева Лидия Николаевна ахтыыта (2004 сыл).