Прибылых Евдокия Иннокентьевна

Прибылых Евдокия Иннокентьевна — өрөспүүбүлүкэ биллиилээх ыанньыксыта, коммунистическай үлэ ударнига.

Евдокия Иннокентьевна Прибылых Мэҥэ-Хаҥалас оройуонугар Төҥүлү нэһилиэгэр 1925 сыллаахха дьадаҥы бааһынай дьиэ кэргэнигэр төрөөбүтэ. Толорута суох орто үөрэхтээх. Аҕа дойдуну көмүскүүр улуу сэрии саҕаланар сылыгар саҥардыы хороччу улаатан эрэр кыыс фермаҕа сүөһү көрөөччүнэн анаммыта. Оччотооҕу көлүөнэ дьон аас-туор олоҕу тус бэйэлэринэн билбиттэрэ.

Евдокия Иннокентьевна 1948 сыллаахха ыанньыксытынан анаммыта, онтон ыла үйэ чиэппэрин устатыгар биир да сыл тохтобула суох үлэлээбитэ. Кини ыанньыксыт үлэтин хара маннайгыттан сөбүлээбитэ, ол иһин колхоһун, оройуонун бастыҥ ыанньыксыттарын опытын сэргэҕэлээн үөрэппитэ уонна үлэтигэр туһаммыта. Билиитэ кэҥээн, опыта байан истэҕин аайы үлэтин көрдөрүүтэ улам үрдээн испитэ. 1955 сыллаахха сүөһү үлэһиттэрин соц. Куоталаһыытыгар бастаан, Бүтүн Союзтааҕы тыа хааһаайыстыбатын быыстапкатыгар кыттан кыһыл көмүс медалынан уонна Саха АССР Советын Бочуотунай грамотатынан наҕараадаламмыта. Бу Евдокия Иннокентьевна бастакы улахан ситииһиитэ уонна үөрүүтэ этэ. Семилетка сылларыгар кини улаханнык өрө көтөҕүллэн үлэлээбитэ. Ыанньыксты дьулуурдаах үлэтин партия, правительство үрдүктүк сыаналаабыта. ССРС Верховнай Советын Президиумун 1966 сыллаахха кулун тутар 22 күнүнээҕи Ыйааҕынан Прибылых Евдокия Иннокентьевна сүөһү иитиитигэр ситиспит кыайыыларын иһин Үлэ Кыһыл Знамята орденынан наҕараадаламмыта.

1971 сыллаахха бэс ыйын 13 күнүгэр Мэҥэ-Хаҥалас оройуонун үлэлээн иитиллээччилэрэ бастыҥ ыанньыксыттарын Саха АССР Верховнай Советын депутатынан быыбардаабыттара.

Бүтүн Союзтааҕы соц. Куоталаһыыга үрдүк көрдөрүүнү ситиспитин иһин ССРС Верховнай Советын Президиумун 1973 сыллаахха балаҕан ыйын 6 күнүнээҕи ыйааҕынан Евдокия Иннокентьевна Ленинын орденынан наҕараадаламмыта.

Евдокия Иннокентьевна – туйгун ыанньыксыт, активнай общественник, аҕыс оҕолоох амарах ийэ этэ.

Евдокия Иннокентьевна 1997 сыллааха 72 сааһыгар күн сириттэн барбыта.