Саха эстрадата

Саха эстрадата — Саха сиригэр 1970-с сыллартан күүскэ сайдыбыт дьону саататаары сыанаттан ыллыыр, ону-маны кэпсиир ускуустуба жанра.

30-с сс. бүтүүлэригэр Сэбиэскэй Сойууска көс артыыстары легализациялааһын саҕаламмыта. Онон оройуоннарга, куораттарга уонна уобаластарга, өрөспүүбүлүкэлэргэ кэнсиэртиир тэрилтэлэр тэриллэн барбыттара. Дьокуускайга эмиэ кэнсиэртиир эстрада бюрота (концертно-эстрадное бюро, кылгатан КЭБ) тэриллибит.

КЭБ бастакы дириэктэринэн Студенцев Всеволод Иванович диэн киһи буола сылдьыбыт.

КЭБ сүнньүнэн кэлии артыыстарынан дьарыктанар эбит, артыыстар биир эбэтэр хас да сезоҥҥа сөбүлэҥ түһэрсэн улуустары кэрийэллэрэ. Онон драма, опера иҥин артыыстара эстрада нүөмэрдэринэн биллэн бараллар. Ол саҕана драма артыыһа Петр Михайлович Решетников эстрада конферансьетын быһыытынан биллибитэ, эмиэ драма артыыһа Христофор Трофимович Максимов — мелодист, баянист, ырыаһыт быһыытынан; опера солиһа Лев Михайлович Попов - сэбиэскэй ырыалары толорооччу быһыытынан; опера солиһа Николай Николаевич Баскаров — оччотооҕу ырыалары толорооччу; баянист Иннокентий Павлович Дураев уо.д.а.

Онтон 50-с сс. бүтүүлэрин диэкки музыкальнай училищены бүтэрбиттэри уонна көннөрү да талааннаах дьону бюро үлэтигэр киллэрэр буолбуттар. Онон ырыаһыт уонна мелодист Ольга Иванова, үҥкүүһүттэр Дмитрий Неустроев, Петр Яковлев кэлии артыыстары кытта гостуруоллуур буолбуттар.