Степанова (Ефимова) Марфа Афанасьевна

Олоҕун олуктара

• 1940 сыллаахха ахсынньы ыйын 10 күнүгэр элбэх оҕолоох дьиэ кэргэӊӊэ бэһис оҕонон күн сирин көрбүтэ. Кини төрөөбүт дойдута Усть-Майа оройуонун Усть-Миль бөһүөлэгэ буолар.
• 1968 сыллаахха Саха Государственнай университетыгар медицинскэй институту бүтэрэр уонна Сунтаар улууһугар Дьаархан нэһилиэгэр ананан улэлии барбыта.
• 1968 – 1990 сылларга Уһун-Күөл дэриэбинэтигэр участковай бырааһынан үлэлээбитэ. Оччоттооҕу кэмӊэ суол-иис куһаҕан буолан сатыы сылдьан үлэлиирэ.
• 1990 -2010 сылларга  Дьаархаӊӊа дневной стационардаах балыыһа туттаран үтүө суобастаахтык  үлэлээбитэ.
• 42 сыл эмчитинэн үлэлээн хас эмэ сүүһүнэн киһи тыынын быыһаабыта , элбэх оҕону күн-сирин көрдөрбүтэ. Билигин кини 78 саастаах , бочуоттаах сынньалаӊӊа олорор , сиэннэрин харайсар, биьиги аймах үтүө-мааны сүбэһиппит

Ийэтэ Варвара Петровна , аҕата Афанасий Петрович колхуоска үлэлээбиттэрэ. Кинилэр төрдүлэрэ Мэӊэ-Хаӊалас этэ.

Аҕа дойду улуу сэриитэ ааӊнаабытыгар сут дьыл турбута. Ол дьыл аны курааннаан от да үүммэтэҕэ. Инньэ гынан эбэм ийэлээх аҕата оҕолорун кыбыммытынан ыраах Усть-Майа улууһугар көһөн барбыттара. Ити курдук эбэм ыарахан да буоллар дьоллоох оҕо сааһа элбэх балыктааҕынан аатырар Алдан өрүс кытылыгар ааспыта.

Бииргэ төрөөбүттэр сэттэлэр этэ. Икки улахан убайдара Афанасий уонна Николай эбэм ийэтин бастакы оҕонньоруттан этилэр. Эдьийэ Мария Афанасьевна нуучча тылын учуутала этэ. Иккис эдьийэ Татьяна Афанасьевна бухгалтер идэлээх этэ. Кини Петропавловскайга олорбута. Улахан быраата Петр Афанасьевич байыаннай үөрэхтээх киьи этэ. Кыра быраата Иван Афанасьевич Усть-Майаҕа олорор.

Оскуолаҕа 9 сааһыгар үөрэнэ киирбитэ. Усть –Майа интернатыгар олорон үөрэх киэӊ аартыгын атыллаан , билии эйгэтигэр умсугуйан туран үөрэммитэ. Үөрэҕэр кыһамньылаах, эппиэтинэстээх  буолан  куруук инники күөӊӊэ сылдьыбыта.

Интернакка олорон үөрэнэр кэмигэр нуучча дьахтара Валентина Михайловна повардыыра. Эбэм киниэхэ көмөлөһөр эбит уонна билигин  наһаа истиӊник саныыр. Киниттэн ас арааһын астыырга үөрэммитэ.

Оскуолатын бүтэрэн баран оччотооҕу кэм ирдэбилинэн ытык иэһин толоро дойдутугар  Петропавловскайга ыанньыксыттыы тахсар. Онно үлэлиир кэмнэригэр эмчит идэтин баһылыан баҕарар санаата күүһүттэн үөрэххэ туттарсаары түүннэри –күнүстэри бэлэмнэнэр. Ол кэннэ 1962 сыллаахха сайын дьоллоох Дьокуускай куоракка эмчит идэтигэр туттарса барар уонна Саха Государственнай университетыгар медицинскэй институтка «Лечебное дело» идэтигэр киирэр. Студенныыр сылларыгар сүрэҕин аӊарын, мин эһэбин, Степанов Виктор Семёновиһы көрсөн ыал буолаллар.

Туһаммыт литература

Чугас дьон ахтыытыттан.