Стручков Петр Никонович

Стручков Петр Никонович (Боччо)

Хотун Төҥүлү соҕуруу өттүгэр Бэрдьигэстээх диэн эбэ баар. Отутус сыллар бүтүүлэригэр мөлтөхтүк көрөр уонна адьас көрбөт оскуолаҕа үөрэнэр саастаах оҕолору үөрэххэ тардар боппуруос күүскэ турбута, оскуола аһан үлэлэтэр наадата тирээбит. 1938 с. оннук оскуола аан бастаан Төҥүлүгэ, онтон 1939 с. Доллу Бэрдьигэстээҕэр көһөрүллүбүтэ уонна 1956 с дылы үлэлээбитэ. Ол кэннэ Якутскайга көһөрүллүбүтэ. Дьэ Бу алаас чугаһыгар Стручковтар баай аймах олорбуттар. Максимов С.А уонна Стручков П.Т. «Доллу кырса күөх» кинигэҕэ: «…атын аҕа уустарыттан Бэрдьигэстээх эҥэр ордук аакка-суолга киирбиттэртэн баай Стручковтар буолаллар, саамай халыҥ аймахтар, элбэх ыал буолан тэнийбиттэр… нуучча итэҕэлин эрдэ ылыммыттар, үөрэхтэниини атын ыаллартан эрдэ өйдөөбүттэр.»

Дьэ бу аймахтан биир норуокка биллибиттэринэн, чаҕылхайдарынан - Стручков Петр Никонович (Боччо) буолар.1900 с саҥатын диэки төрөөбүт. 19-20-гэр куоракка үөрэнэ киирэр. Ол үөрэнэ сылдьан, революционнай өйдөөх-санаалаах ыччаттарга холбоһон, М.В.Ксенофонтов кистэлэҥинэн тэрийбит «Эдэр коммунистар союзтара» (сорохтор этэллэринэн «Социал демократ» түмсүү) биир активнай чилиэнэ буолар. Платон Алексеевич Ойуунускайдыын бииргэ үөрэммит, бодоруспут. Кырдьаҕастар этэллэринэн, Платон Алексеевич сайын дойдутугар Тааттаҕа баран иһэн Билир сайылыкка (М.Горькай аатынан совхоз биир аатырбыт сайылыга) иккитэ хаста хонон ааспыта биллэр. Хоно кэлбит эдэр ыччат саха оонньуутугар күрэхтэһэллэригэр, Ойуунускай атах оонньуутугар кыайара үһү. Наһаа чэпчэкитик кылыйара диэн кэпсээҥҥэ баар.

Петр Никонович 1919 с. ахсынньыга Якутскай гарнизона үрүҥнэри самнарыытыгар кыттыспыт. Ити кэннэ Мэҥэ улууһугар тахсан Советскай былаас бастакы дьаһалларын олоххо киллэрсиигэ үлэлэспит. Ол иһин аҕатыттан, ийэтиттэн мөҕүллүбүт. Күһүҥҥү муҥха кэмигэр тахсан баайдартан балыктарын ылан дьадаҥыларга түҥэппитэ биллэр. Ити сылдьан сэллигинэн ыалдьар уонна 1922 с олунньутугар Аччыгый Ааллаах өтөҕөр өлөр. Аймахтара, төрөппүттэрэ өстүйэннэр тугунан да көмөлөспөтөхтөр. Ыалдьа сыттаҕына тастыҥ быраата Роман Илларионович Стручков ыарыылаабыт. Кини кэпсииринэн, оччотооҕу комсомоллар, чиэстээн-бочуоттаан Нөмүгү уонна Киһи Уҥуохтаах алаастар икки ардыларыгар көмпүттэр. Памятник туппуттарын, ол түүн оччотооҕу норуот өстөөхтөрө уоттаан кэбиспиттэр. Эһиил 2018 с. 100 сааһын туолуохтаах Ленинскэй комсомол биир чаҕылхай чилиэнэ – Петр Никонович (Боччо) билигин да норуокка истиҥ тылынан ахтыллар.