Стручков Степан Никифорович

Стручков Степан Никифорович (1913 с. сэтинньи 24 күнэ - 1981 с. ахсынньы 11 күнэ) — Мэҥэ-Хаҥалас улууһун Дьабыыл нэһилиэгэр бастакынан комбайны, локомотивы, электрическэй мотуордаах миэлиҥсэни үлэлэппит туруу улэһит, бастакы тракторист, электрик уонна рационализатор.

Төрөппүттэрэ Стручков Никифор Константинович уонна Дьяконова Анна Михайловна. Кэргэнэ Лыткина Татьяна Алексеевна (1924 -1980) Чурапчы оройуонун Чаачыгыйыттан төрүттээҕэ. Оҕолоро: Варвара (1948), Степан (1950), Алексей (1951-2008), Гаврил (1954), Анастасия (1959).

1940-1941 сс. Төҥүлүгэ саҥа тэриллибит МТС директорынан Украинаттан кэлбит Сергей Викентьевич Король анаммыта. Оччолорго Дьабыыл 4 колхоһун биир "ХТЗ-2" тракторын, булуугун, сеялкатын, от охсор массыынатын, бурдук быһар жнейкатын өрөмүөннүүргэ Степан Никифорович быраатынаан Александрдыын туруулаһан үлэлээбиттэрэ. Хаста да Степан Никифоровиһы фроҥҥа ыытаары гыммыттарын, Сергей Викентьевич көрдөһүүтүнэн, бронь бэрдэрэн хаалларбыттара. Ол курдук кинини солбуйар киһи суоҕа.

Степан Никифорович Дьабыыл 4 колхоһунан тракторист куурсун үөрэнэн бутэрбит эдэркээн кыргыттары сменщигынан илдьэ сылдьан тракторист идэтигэр уһуйбута. Кинилэр сэрии сылларыттан хойуккаанна диэри үлэлээн, МТС киэн туттар трактористара буолбуттара. Марфа Яковлевна Баишева Саха АССР Верховнай Советыгар депутаттаабыта. "Степан Никифорович төһө да тэҥҥэ улэлээтэр, эдэр кыргыттары харыстаан, күнүһүн солбуһуннара сылдьан сменщик оҥосторо, түүнүн бэйэтэ улэлиирэ", - диэн ахтар тыыл, улэ ветерана Прасковья Борисова.

Кини чахчы да айылҕаттан айдарыылаах мындыр киһи этэ. Дьабыыл нэһилиэгин үгүс тутуутугар кини айбыт "көтөҕөр кыраана" туһаныллыбыта. Илии ыарахан үлэтин чэпчэтэр бары оҥоһуктарын муспута буоллар, бэйэтэ туспа, сыаналаах рационализаторскай материал буолуо хааллаҕа. 1967 с. оройуоҥҥа бастыҥ рационализатор аатын ылбытын туоһулуур сибидиэтилистибэлээҕэ. Сэрии кэмигэр "ХТЗ" тракторынан саас "көрүүчэй" лэкээ эрбэтэрэ, сайынын сиилэс уксуһара, сааскы ыһыы, паар үлэтэ, күһүҥҥү бурдук хомуура барыта кини салайыытынан барара.

Степан Никифорович сэрииттэн төннөн кэлбит уолаттары трактор уонна комбайн ыытарга үөрэтэлээбитэ. Колхоз, совхоз саамай киэн туттар механизатордара киниттэн үөрэммиттэрэ. Үгүстэрэ пенсияҕа тахсан баран слесарь, токарь буолбуттара. Бастакы комбайны үлэлэппит киһинэн кини буолар. Давид Миронович Борисовтыын бастакы локомотивы таҥаннар, 1957 с. сэтинньи 7 күнүгэр Дьабыылга электро-уоту аан маҥнай кинилэр биэрбиттэрэ. Бастакы миэлиҥсэни станция олоҕор таҥан, үлэлэтэн, мээккэ бурдугу ылбыта. 1963 с. саҕалаан, ыаллар телевизор атыылаһан, оҥорон көрөр буолбуттара. Онно маастар эмиэ кини этэ, ыҥырыыга сылдьара. Остуол, олоппос, тимир ылтаһынтан "чох хабаала", күлүүккэ, килиэп буһарар лиис оҥортообута билиҥҥэ дылы сайылыкка туһалыы сылдьаллар.

Кэлин МТС-тар эстэннэр, автопаркаларга кубулутуллубуттарыгар, Степан Никифорович, төһө да сааһырдар, кадровай булчут буолбута.

Стручковтар 5 оҕолонон, элбэх сиэннэнэн утумнара салҕанар.