Тарбаҕы үтүктүһүннэрии, оонньуу
Тарбаҕы үтүктүһүннэрии - оҕо оонньуута.
Хас да оҕо оонньуур. Биир көрдөрөөччү, атыттар үтүгүннэрээччи буолаллар. Көрдөрөөччү тарбахтарынан хамсатарын атыттар үтүгүннэрэн иһиэхтээхтэр. Кыайан үтүгүннэрбэтэхтэр оонньууттан туорууллар, атын оҕолор кытталлар. Көрдөрөөччү тарбахтарын сыһыары тутан баран, илиитин иннин диэки уунар уонна тарбахтарынан араастаан оонньуур.
Холобур маннык, атын үс тарбахтарын хамсаппакка эрэ сөмүйэтин киэҥник арааран атытар, араарбыт сөмүйэтигэр, атын тарбахтарын хамсаппакка, ортоку тарбаҕын сыһыарар, онтон ити икки тарбаҕар, ылгын чыҥыйатын хамсаппакка эрэ, аата суоҕун арааран, холбуу тутар. Ылгын чыҥыйатын атын тарбахтарыгар холбоон баран, аны ылгын чыҥыйатыттан саҕалаан, эмиэ тарбахтарын биирдии араартыыр. Хаҥас илии тарбахтарынан эмиэ оонньуохха сөп. Тарбахтары араастаан бытааннык, түргэнник, арыт хат-хат араартыыллар.