Харлампьев Василий Пудович

Харла́мпьев Васи́лий Пу́дович — Хара Лааҥкы (04.03.1947-18.01.2022) — поэт. Саха сирин суруйааччыларын сойууһун чилиэнэ.

Олоҕун олуктара

Үөһээ Бүлүү улууһун Нам нэһилиэгэр 1947 сыллаахха кулун тутар 4 күнүгэр күн сирин көрбүтэ.

Айар үлэтэ

Айар үлэҕэ оҕо сааһыттан тардыспыта. Оскуолаҕа үөрэнэ сылдьар кэмнэригэр 5-с кылаастан саҕалаан хоһоон суруйарга холонон көрөр, корреспондент курдук интэриэһинэй дьарыгынан дьарыктаммыта. Бастакы хоһооно 1964 с. ыам ыйыгар «Коммунизм суола» хаһыакка бэчээттэммитэ. 70-с сыллартан айар идэнэн дьарыктанар.

Ол түмүгэр күҥҥэ көрбүт үс кинигэлээх:

• «Дууһам саһарҕатын көрүстүм» (1993),
• «Таптыам, өссө таптыам» (1998),
• «Күнү бүгүн биллим, күнү бүгүн ситтим» (2001).

Василий Харлампьев айар үлэтигэр Хара Лааҥкы диэн биир дьикти псевдонимынан киирбитэ. Кини хоһоон суруйарын таһынан айылҕаҕа баар араас көстүүнү: силиһи-мутугу көрөн араас уус-уран фигуралары, көстүүлэри оҥорон таһаарар, лааҥкыны кытта өрө тустар. Бу сэдэх дьарыктан сиэттэрэн айар үлэҕэ сыһыаран Харлампьев олоҕун Хараны ылан, Лааҥкыны эбэн Хара Лааҥкы диэн ураты ааты иҥэриммитэ.

Хара Лааҥкы айар үлэтин туһунан

«Василий Харлампьев — Хара Лааҥкы хоһооннорун аахпытым ыраатта, маҥнайгы холонууларыттан ыла диэхпин сөп. Кини хоһоонноро бука бары бэрт кылгастар, чопчу образтаахтар, чөмчөтүллүбүт, нарыламмыт санаалар. Биир да хоһоон страницаттан орпот! Оттон бу үлэттэн, поэзияҕа ураты санаалаахтан тахсар. Кини ойуур маһын одуулаан, туохха эрэ маарынныыр мутуктары, эбэтэр түөрүллэ сытар чөҥөчөк дьикти силистэрин булан, кыылы-сүөлү, көтөрү-сүүрэри бэркэ кыһан кэбиһэр маастарын кэриэтэ туох эмэ сонуну булбутун чопчу тутан чочуйан, сып-сап кыра хоһоон оҥорон кэбиһэр, олох сонун кырыыларын айар» диэбитэ саха народнай поэта, Хара Лааҥкы такайааччыта, айар үлэҕэ умсугуппут учуутала П. Н. Тобуруокап.

«Кырдьык да тропическай Шри-Ланкаттан төрүттээх курдук сирэйдээх Хара Лааҥкы хоһооннорун үгүс ааҕааччылар сөбүлүүллэр — кини поэзията Арктика хаарын курдук сырдык, ыраас сыдьаайдаах. Онно, бука, төрөөбүт-үөскээбит, иитиллибит эйгэтэ улаханнык сабыдыаллаабыта, олоҕо-силэҕэ, үлэтэ-дьарыга да сөп түбэспитэ буолуо дии саныыбын» — диэн эппиттээх суруйааччы Сэмэн Руфов.

Сигэлэр

В Верхневилюйске прошел Ысыах писателей // 5.7.2012