Чороон (ВИА)

«Чороон» — 70-с сыллар саҕаланыыларыгар Чурапчыга тэриллибит вокальнай инструментальнай ансаамбыл. Бастаан самодеятельнай этэ, онтон идэтийбит бөлөххө кубулуйбута. Тэрийээччилэр Владимир Мохначевскай уонна Вячеслав Саввин.

Устуоруйата

Оскуола оҕолоро 70-с сыллар саҕаланыыларыгар ыраах туманнаах дойдуга тыаһаабыт «Битлз» дорҕооннорун оччотооҕуга бобуулаах омук араадьыйатын долгуннарыттан истэн, үйэ сайдар хайысхатын эттэринэн-хааннарынан сэрэйэн Чурапчыга аан бастаан вокальнай инструментальнай ансаамбылы тэрийбиттэр. Кинилэр электрическэй гитараны ойууттан көрөн, бэйэлэрэ мастан кыһан оҥорбуттара.

Маастарынан оскуола оҕото Володя Мохначевскай, музыкаҕа уһуйааччынан эдэр учуутал Вячеслав Саввин буолбуттара. 1972 с. В.А. Босиков салайааччылаах КЭБ (концерт-эстраада бюрота) Москубаҕа дьону үөрэттэрээри куонкурус биллэрбит. Саха сириттэн бүтүннүүтүттэн 200-тэн тахса оҕо Дьокуускайга мустан ол куонкуруска кыттыбыттара. Онно Вячеслав уонна Владимир кытталлар. Кинилэргэ Черниговскай диэн нуучча уолун уонна барабааҥҥа Аталев Василий (Сыгаан Бааска) диэн киһини эбэн ВИА тэрийбиттэр. Икки нэдиэлэ репетициялатан баран гастролга ыыппыттар.

Онтон бөлөҕү ырыаһыт Бубякины кытта Москубаҕа үөрэтэ ыыппыттар. Эдэр музыкааннары Владимир Куприянов диэн эдэр композитор уһуйбут. Кини аранжировка диэн тугун, ханнык үнүстүрүмүөннэргэ хайдах оонньонорун көрдөрөн, үөрэтэн биэрбит. Кини сахалыы мелодилары бэйэтэ аранжировкалаан, холобур "Умнуллубат онус кылаас" ырыаны, инструментальнай музыкаҕа сөп түбэһиннэрэн биэрбит. Ол үөрэх кэмигэр уолаттар уопсай музыкальнай култуураларын таһымын үрдэтэллэр, Дин Рид, элбэх омук бөлөхтөрүн (Италия, Югославия, Япония) кэнсиэрдэригэр сылдьаллар.

Онно балтараа сыл курдук үөрэнэн, Ускуустуба үлэһиттэрин Киин дьиэтигэр (ЦДРИ) сыанатыттан оонньоон иҥин, аппаратуураланан, репертуарданан, көстүүмнэнэн Дьокуускайга төннөллөр. .