Арассыыйа салайааччылара

Русь, Нуучча улууһун, Арассыыйа, Арассыыйа импиэрийэтин, Сэбиэскэй Арассыыйа, ССРС, Арассыыйа федерациятын салайааччылара (862—2010).

Билиҥҥи Арассыыйаны хас да урут баар буола сылдьыбыт иллэри (судаарыстыбалары, импиэрийэлэри) кытта ситимнииллэр. Олортон Арассыыйа билиҥҥи историографиятыгар ордук билиниллэллэр: Русь (Киевскэй Русь, Владимирскай Русь), Көмүс Ордуу Нуучча улууһа (бастаан Владимир куоракка, кэлин Москубаҕа кииннээх), тутулуга суох Русь (Уордаах Уйбаан уонна кини уола Василий III саҕана), Арассыыйа (1533-1689 сс.), Арассыыйа Импиэрийэтэ (Олунньутааҕы Өрөбөлүүссүйэҕэ дылы), Арассыыйа (1917 с. кылгас кэмҥэ), Сэбиэскэй Арассыыйа, ССРС уонна Арассыыйа Федерацията (1991 сылтан билиҥҥэ дылы).

Онно сөп түбэһиннэрэн Арассыыйа салайааччыларынан ити иллэр баһылыктарын ааттыыбыт.

Бу барылынан аан бастакы салайааччынан Рюрик I ааҕыллар. Барыта билиҥҥи туругунан 120 салайааччы утуу-субуу, сороҕор биир да кэмҥэ олоро сылдьыбыт. Сорох баһылыктар былааска хаста да олоро сылдьыбыттар, холобур, Юрий Долгорукай XII үйэҕэ былаас былдьаһыытын түмүгэр 26-с, 29-с, 32-с уонна 36-с улуу кинээс буола сылдьыбыт.