Ахсааннар битигэ

Ахсааннар битигэ (был.-гириэк. Ἀριθμοί; ивр. בְּמִדְבַּר‎, "Куйаарга") диэн Тора уонна Эргэ Ыйаах төрдүс битигэ. Ахеменид империятын кэмигэр суруллубута (б.э. иннинэ 5 үйэ). Битик аата дьэбэриэйдэр ахсааннарын буолбут сурутуутуттан тахсар. 36 бастаах.

Ахсааннар битигин саҥатыгар дьэбэриэйдэр Синай хайаҕа Таҥараттан Сөбүлэҥи уонна Төрүннэрин ылаллар. Таҥара кинилэр туппут Ытык Отууларыгар дьиэлэнэр. Дьэбэриэйдэр Мэктиэлэммит Сири ыла барарга бэлэмнэнэллэр. Дьон ахсаанын сүһүөхтэринэн, эрдэринэн, дьахталларынан, оҕолорунан, аҕабыттарынан ааҕаллар. Моисей биитинээн Аароннуун хаамыы баһылыктара буолаллар. Айан суолугар араас ыарахаттары көрсөллөр, элбэх киһи өлөр. Битик бүтэһигэр Моаб сыһыытыгар баар Иордан өрүскэ кэлэллэр.

Ахсааннар битигин кэпсээнэ дьэбэриэйдэр Египет кулуттааһыныттан босхолонон баран өбүгэлэригэр Таҥара Мэктиэлээбит сирин баһылыы барар айаннарын муҥутуур чыпчаала буолар. Бу курдук Үөскээһин, Барыы, Левит битиктэргэ кэпсэммит тосхоллору холбоон түмүктүүр: дьэбэриэйдэр Таҥаранан талыллыбыт өлгөм ахсааннаах улуу омук буолуохтара, Кини көмөтүнэн бары өстөөхтөрүн кыайыахтара, мэктиэлэммит Ханаан сирин баһылаан ылыахтара.