Дьаакып

Дьаакып (ивр. יַעֲקֹב‏‎‎) диэн Ыһыраайыл үһүс аҕа баһылыга. Аанньалы кытта тустан баран Ыһыраайыл диэн ааттаммыта. Ысхаак уонна Ребекка уола. Ыһыраайыл уон икки биистэрин төрүттээччитэ. Абыраам итэҕэллэрин биир тутаах киһитэ.

Үөскээһин битигэ кэпсииринэн, Ысхаак уонна Ребекка холбоһон баран сүүрбэ сылынан Дьаакып уонна Ысаап диэн икки игирэ уолаттары төрөппүттэр. Ребекка хат сылдьан ыалдьан муҥнанар эбит. Ребекка Таҥараттан ыйыппыт - мин туох иһин маннык эрэйдэнним? Таҥара киниэхэ биллэрбит - эн искэр баар игирэ уолаттар бэйэ бэйэлэрин кытта охсуһаллар; төрөөн да баран олохторун тухары охсуһуохтара; игирэлэртэн икки туспа омук төрүттэниэҕэ; кинилэр эмиэ бэйэ бэйэлэрин кытта охсуһуохтара; кэмниэ кэнэҕэс ини игирэттэн төрүттээхтэр күүһүрэннэр бии игирэттэн төрүттээхтэри бас билиэхтэрэ. Ребекка сотору Таҥара эппитин курдук икки игирэ уолу төрөппүт. Уолаттар майгыларынан да дьарыктарынан да атын-атын буолан улааппыттар. Ысаап сатабыллаах булчут хонуу киһитэ буолбут; онтон Дьаакып көрсүө майгылаах отуу киһитэ буолбут. Ысхаак Ысаабы ордук таптыыра, Ысаап бултаабыт таба этинэн аҕатын аһатара; Ребекка буоллаҕына Дьаакыбы ордук таптыыр эбит. Дьаакып ийэтин сүбэтинэн Ысааптан бастаан төрөөһүн төрүнүн "кыһыл симэһиннээх аска" атастаһан ылбыт. Уонна Ысаап буолан кубулунан өлөөрү сытар көрбөт аҕатыттан алҕааһынын ылан дьэбэриэй омугун төрүттээччитэ буолбут. Ысаап албыннаппытын билэн баран кыыһыран Дьаакыбы өлөрүөм диэн сааммыт. Дьаакып Харран диэн хотоҕо куотан барар. Харраҥҥа Ребекка суруһа Лабаан олорор эбит. Дьаакып кини дьиэтигэр кэлбит. Лабаан элбэх сүөһүлээх эбит. Дьаакып киниэхэ маныыһыт буолбут. Лабаан икки кыыстааҕа - аҕаһа Лиэйэ, балыһа Рахил. Дьаакып Рахилы таптыы көрбүт уонна Лабааҥҥа эппит - мин эйиэхэ сэттэ сыл үлэлээтэхпинэ Рахилы миэхэ ойох биэр. Лабаан сөбүлэспит. Ол эрэн сэттэ сылынан эппит тылыгар турбакка Рахил оннугар Лиэйэни биэрбит. Хорум сэттэ сыл үлэлээтэххинэ Рахилы биирдэ биэриэм диэбит. Сэттэ сылынан Дьаакып Рахилы дьэ ойох ылбыт уонна дойдутугар Ханааҥҥа төннүөн баҕарбыт. Ону Лабаан кинини ыыппатах. Онон Дьаакып Харраҥҥа хорум алта сыл олорбут. Бу кэннэ Дьаакып Лабаанныын этиһэн баран ойохторун оҕолорун ылан Ханааҥҥа төннүбүт. Хас да сыл ааспытын кэннэ Дьаакып Бэт-Эл диэн сиргэ барар. Арай биир түүн айан суолугар киниэхэ Аанньал көстүүлээх Таҥара кэлбит. Дьаакып киниттэн алҕааһын көрдьөөн халлаан сырдыар дылы тустубуттар. Таҥара Дьаакып дьулуурун билинэн кинини алҕаабыт уонна "Ыһыраайыл" (Таҥаралыын тустааччы) диэн саҥа аат биэрбит. Кэлин Ханаан сиригэр сэттэ дьыллаах улуу кураан буолар. Дьаакып дьонун кытта Эгиипэккэ көһөн бараллар. Манна 147 сааһыгар өлбүт.

Дьаакып удьуордара

Дьаакып түөрт дьахтартан уон икки уолламмыт. Ойохторо Лиэйэ уонна Рахил. Нүһэйдэрэ Билха уонна Зилпа. Лиэйэттэн Дина диэн биир соҕотох кыыстаммыт.

Лиэйэ уолаттара: Рувим, Симеон, Леви, Иуда, Иссахар, Забулон.
Рахил уолаттара: Дьуоһуп, Биньямин; Рахил Биньямины төрөтөн баран өлбүтэ.
Билха уолаттара: Дан, Нафтали.
Зилпа уолаттара: Гад, Ашер.

Бу Дьаакып уон икки уолун удьуор биистэриттэн дьэбэриэй омуга үөскүүр.