Марков Сергей Константинович

Олоҕун олуктара

Марков Сергей Константинович 1951 с. ахсынньы 25 күнүгэр Дьокуускай куоракка төрөөбүтэ. Аҕата Константин Сергеевич Марков Чурапчы оройуонун Мэлдьэхси нэһилиэгиттэн төруттээх, үлэ, тыыл бэтэрээнэ.

Сергей оҕо эрдэҕиттэн үчүгэйдик уруһуйдуура, онон, 9 кылааһы бүтэрээт, Дьокуускайдааҕы художественнай училищеҕа үөрэнэ киирбитэ. Училищетын 1972 c., тимиртэн, мастан, сэлии муоһуттан уус-уран оҥоһуктар маастара идэлээх бүтэрбитэ. Армияҕа сулууспалаабыта. Онтон 1976 с. Москватааҕы Строганов аатынан Үрдүкү художественнай промышленнай училищеҕа киирбитэ уонна 1981 сыллаахха ситиһиилээхтик бүтэрбитэ.

Айар үлэтэ

1981 с. Сергей Марков Нерюнгри куоракка тиийэн Саха сирин Худфондатын мастарыскыайдарын филиалын төрүттээбитэ. Куораттар уонна бөһүөлэктэр аныгылыы уус-уран көстүүлээх, сахалыы тыннаах буолалларын туһугар араас саҥа идеялары, бырайыактары олоххо киллэртээбитэ. Кини чеканканан уус-уран үлэлэрэ “Россия эдэр сааһа”, “Төрөөбүт дойду устун” диэн бутун Россиятааҕы уонна “Сэбиэскэй Дальнай Восток” VII зонатааҕы уус-уран быыстапкаларга дьүүллүүр сүбэ саамай үрдүк сыанабылларын ылбыта.

1991 с. Сергей Марков ССРС Худуоһунньуктарын сойууһун чилиэнэ. Россия народнай худуоһунньуга, биир дойдулааҕа Афанасий Мунхалов кини туһунан маннык этэн турардаах: “Сергей Марков – үрдүк үөрэхтээх дьиҥнээх саха тимир ууһа, тимири ыллатар талааннаах худуоһунньук этэ, өссө үүнэр-сайдар кыахтааҕа, хомойуох иһин, оһолго түбэһэн бу олохтон эрдэ барбыта... Сергей норуот уус-уран айымньытыгар - Олоҥхоҕо элбэх үчүгэй үлэлэрдээх, суруйуулардаах”. Кини өссө Москваҕа устудьуоннуур сылларыгар Ойуунускай “Дьулуруйар Ньургун Боотур” олоҥхотугар улахан болҕомтотун ууран, хас да үлэни саҕалаабыта. ол курдук, 1985 сыллаахха сахалартан биир бастакынан “Ньургун Боотурга” чеканкаттан олус интириэһинэй триптиҕи оҥорон, айан таһаарбыта.

Сигэлэр

Чурапчы улууһун олоҥхоһуттара : антология/[хомуйан оҥордулар : М.А.Герасимова, Е.Н.Протодьяконова, Р.Н.Анисимов ; редкол. ; В.Н.Иванов (бас ред.), А.Н.Жирков, А.А.Кузьмина уо.д.а.]. – Дьокуускай : Алаас, 2015. – 368 с.