Самсонов Юрий Дмитриевич

Самсонов Юрий Дмитриевич (1944–), суруналыыс.

Олоҕун устуоруйата

Самсонов Юрий Дмитриевич 1944 сыллаахха Оҥхой нэһилиэгэр аҥардас ийэҕэ төрөөбүтэ. Самсонов Дмитрий Константинович кэргэнинээн Марыыналыын ииттэ ылбыттар.

Юрий кыра кылааска Үөһээ Бүлүүгэ И.Н. Барахов аатынан оскуолаҕа үөрэммитэ. Онтон Хоро оскуолатыгар сэттиһи бүтэрэн баран Үөһээ Бүлүүгэ киэһээҥи оскуолаҕа үлэлии-үлэлии үөрэнэн онуһу бүтэрбитэ.

Хороҕо үөрэнэр сылларыгар хоһооннору, кыра кэпсээннэри суруйара. Оччотооҕу саха тылын учууталлара Валерий Чиряев, Афанасий Бойтунов оҕолору суруйарга үөрэтэллэрэ. Бииргэ үөскээбит табаарыһа Вася Васильевтыын түүннэри олорон суруйар этилэр. «Бэлэм Буол» хаһыакка суруйаллара. Вася Васильев кэскиллээх суруналыыс буолан иһэн эдэр сааһыгар ыалдьан олохтон туораабыта. Юра эдэр сааһын доҕотторо Уйбаан Ороһуунускай, Коля Павлов, Петя Федоров-Хоринскай бииргэ түмсэн кэпсэтэллэрэ, кинигэни ырыталлара.

Оскуоланы бүтэрэн баран Мииринэйгэ баран милииссийэнэн үлэлии сылдьыбыта. Хараҕа мөлтөх буолан эрдэ аармыйаҕа ыыппатахтара. 25 сааһыгар баҕа өттүнэн тылланан барбыта. Икки сыл Читаҕа үчүгэйдик сулууспалаан сержант званиелаах кэлбитэ. Кэлээт тутуу биригээдэтигэр үлэлээбитэ. Хороҕо кулуубу, ыаллар олорор уопсайдарын туппуттара.

Онтон оскуолаҕа кочегарынан өр сылларга үлэлээбитэ. Кини хаһыаты, кинигэни сүрдээх элбэхтик ааҕара. Ханнык баҕарар бэлиэ күннэри, улуу дьоннор төрөөбүт күннэрин билэр, дьонннорун хаһан төрөөбүттэрин, онтон да атын сыыппаралары ыйыттахха билэр буолара. Саха суруйааччыларын туһунан араас литературалары хасыһан хаһыаттарга таһаартарара.

Оройуонун хаһыатыгар заметкалары, ыстатыйалары суруйара. Олоҕун тиһэх сылларыгар оройуонун киинигэр Үөһээ Бүлүүгэ киирэн дорожнайдарга харабылынан үлэлээбитэ. Онно «Чэчир» түмсүүгэ сылдьыбыта.