Саха бала5ана ыраах Исландия5а

Биhиги ийэбит Евдокия Гаврильевна Аргунова, Герой ийэ бииргэ тѳрѳѳбүт балта Александра Гаврильевна Аргунова (Күөрэгэй) Исландияҕа олорор, түөрт оҕолоох. Кини 60-сыллар саҕана Москваҕа театральнай училищеҕа үөрэнэ сылдьан, ВГИК-кэ режиссерскэй факультекка үөрэнэр Магнус Йонссоны, исландеhы көрсөн ыал буолбут. 1966с. Исландияҕа олохсуйбуттар. 47 сыл олорорун тухары, төрөөбүт сахатын тылын умнубакка, холкутук саҥарар, кэпсэтэр.

1990с. Дьокуускайга кэлэ сылдьан, музыка үрдүкү оскуолатын ректора В.А.Босиковы көрсөн, саха балаҕанын туттарыан баҕалааҕын эппит. Ол туhунан В.Босиков Республика Правительствотын кытары кэпсэтэн, быhаарыы ылыллыбыта. Биhиги, бырааттара, нэhилиэкпит сиригэр мас кэрдэн, тиэллэн барар гына бэлэмнээбиппит. Эдьиийбит баҕа санаата туолан, 1999с. балаҕан буолар мас, Тикси-Архангельскай-Голландия порда-Рейкьявик маршрутунан, муоранан айаннаан тиксибитэ.

2002с. сайын мин бырааппынаан Колялыын Исландияҕа тиийэн, балаҕан дьиэтин икки ый устата туппуппут. Коля- норуот уус-уран оҥоhуктарын маастара. Эдьиийбит балаҕаны, дьиэтин тиэргэнигэр, туох баар сиэри-туому тутуhан туттарбыта. Олорор дьиэтигэр сэдэх музейдаах, онно сахалыы иhит, мал-сал, хартыыналар, кинигэ арааhа баар. Бу тэриллэрин эрдэ самолетунан ыыттарбыт, онуоха Культура министиэристибэтэ көмөлөспүт. Сахалыы ырыаны холбоон истэрин сөбүлүүр.

Сахатын сирин маhын, сибэккитин үүннэрэр, ол курдук хатыҥы, бэhи, харыйаны, ньургуhуну, сардаананы.

Исландия дьоно сүрдээх судургу майгылаах үлэhит дьоннор эбит. Атын омуктарга ытыктыбыллаахтык сыhыаннаhар үрдүк культуралаахтар. Айылҕата дьикти, тыйыс, тымныы, биhиги сылдьар кэммитигэр иккитэ эрэ күн кѳрѳн ылбыта уонна барыта ардахтаах этэ. Күѳллэригэр куhа-хааhа дэлэй, ол эрээри бултаабаттар, хас биирдии кѳтѳрү бэлиэтии, кѳрѳ-истэ сынньаналлар. Каникул кэмигэр элбэхтик айанныыллар, туристыыллар.

Эдьиийбит хас да омук тылынан иҥниhэ суох кэпсэтэрин, бараммат эрчимин, элбэх доҕоттордооҕун, дьулуурдаах улэhитин сѳхтүбүт уонна кининэн киэн тутуннубут.

                                                                                                                              Савва Иннокентьевич Данилов
                                                                                                                                                    2014с.

"Кировскай" кинигэ 2014с. Редакционнай коллегия: Иванова Т.В.,Угарова В.Н., Дьячковская А.Н., Леонтьева Е.А., Леонтьева Е.Н., Леонтьева М.И., Николаева О.С., Александров И.Н.