Слепцов Дмитрий Иванович
Слепцов Дмитрий Иванович - Бачыгыратар уола (1867-1933) - Мэҥэ улууһун кулубата, уопсастыбаннай диэйэтэл, телеграф линиятын тутааччы уонна балыгынан эргиммит атыыһыт. Сахалар 1912 сыллааҕы сийиэстэрин кыттыылааҕа.
Мэҥэ улууһун Үһүс Мэлдьэхси нэһилиэгиттэн төрүттээх. Дьокуускайдааҕы прогимназияны бүтэрбит. Бастаан Мэҥэ улууһугар суруксуттаабыт. Мэҥэ улууһун кулубата буола сылдьыбыт. Сахалар сийиэстэрэ буолуон эрэ иннинэ иккистээн талыллыбыт. Тулагы баайа Эверстов күтүөтэ[1]. Дьокуускай - Охуоскай телеграф линиятын тутууга бэдэрээт ылан дьону улэлэппитэ биллэр. Өлүөнэ дельтатыгар дьону балыктатан эргинэр эбит. 1906 сыллаахха Сахалар Сойуустарын тэрийсибит киһи, Мэҥэ улууһугар сойуус бэрэстэбиитэлинэн үлэлээбит-хамсаабыт, Киин кэмитиэтин чилиэнэ буола сылдьыбыт. Бэйэтин улууһугар тэрилтэ салаатын тэрийбит, нэһилиэктэргэ эмиэ оннук салаалары тэрийтэлээбит. 1906 сыл тохсунньу 19 күнүгэр сойуус атын чилиэннэрин кытта хаайылла сылдьыбыт, ол эрээри 1906 сыл балаҕан ыйын 15 күнүгэр сууттанан "дакаастабыл суоҕунан" хас да киһини кытта көҥүл ыытыллыбыт.
1913 с. Романовтар династиялара 300 сылын туолуутугар Санкт-Петербурга бара сылдьан сахалар араас кыһалҕаларын биэдэмистибэлэргэ туруорсубут киһи.
1921 с. икки сылга күһэйиилээх үлэҕэ ыытыллыбыт. Онтукатын 1991 сыллааха реабилитациялаабыттара[2]
1933 сыллаахха өлбүт.