Слепцов Семен Николаевич

Слепцов Семён Николаевич (1890-1950) XX үйэ саҕаланыытыгар саха уопсастыбаннай диэйэтэлэ, Гражданскай сэрии кыттыылааҕа.

Дьааҥы куоратыгар 1890 с. төрөөбүтэ. 1900 с. Дьокуускайга реальнай училищеҕа киирэн, биир эрэ сыл үөрэммитэ.

Дойдутугар төннөн кэлэн баран, олохтоох былааһы утары тыллаһар буолан, исправник Кочаровскай иккитэ хаайа сылдьыбыт. Колчак былааһын кэмигэр эмиэ буруйданан хаайылла сылдьыбыт. 1920 с. Колчак былааһа эстибитин кэннэ С.Н. Слепцов уездтааҕы Сэбиэт бэрэссэдээтэлинэн талыллар. 1922 с. үрүҥнэр этэрээттэрэ Дьааҥы куоратын төгүрүйэллэр. Түүн, хараҥаны туһанан, кыһыл этэрээтэ, 13 киһи, төгүрүктээһинтэн куотан, Эндыбал руднигынан Бүлүүгэ түһэллэр. Бүлүүгэ тиийэн, С.Н. Слепцов табаарыстарын кытта Бүлүү куоратын көмүскэлигэр кыттар. Дьааҥы куората үрүҥнэртэн босхоломмутун кэннэ дойдутугар төннөр.

1929-30 сылларга буолбут Булуҥ уонна Анаабыр кыргыһыыларыгар кыттар. Кыһыллар этэрээттэрин аһынан-үөлүнэн, көленөн хааччыйыыга үлэлэһэр.

1930 сылтан наар райпотребсоюз тэрилтэлэригэр үлэлээбитэ. Семен Николаевич I950 сыллаахха Дьааҥы куоратыгар өлбүтэ.