Яковлев Семен Семенович

Семен Семенович Яковлев 1910с. от ыйын 26 күнүгэр Сунтаар улууһун Сиэйэ Муоһаанытыгар төрөөбүтэ. Атырдьах ыйыгар сир-дойду силигилээн турдаҕына күн сирин көрбүтэ. Биллиилээх иннэһит С.С.Яковлев доруобуйа харыстабылыгар эҥкилэ суох барыта 65с үлэлээбитэ, аптаах иннэтинэн элбэх киһини эмтээн үтүөрдүбүтэ, ыарыыларын чэпчэппитэ. Кини биэс оҕону төрөтөн, эһээ буолар дьолу билбитэ. Сиргэ кэлбит аналын барытын толорон күн сириттэн барбыта. Ыарахан ыарыыттан араас ньыманан эмтэнэн бэйэтэ 82 сааһыгар диэри олорбута.

Биллиилээх иннэһит. Сунтаар улууһун бочуоттаах гражданина, доруобуйа харыстабылыгар эҥкилэ суох 65 сыл үлэлээбит тыа фельдшерэ.

Оҕо сааһа

Оҕо эрдэҕиттэн барыны бары сэргээн көрө, мындырдык толкуйдуу, айа улааппыта. 1930с. сэттис кылааһы бүтэрэн баран салгыы Дьокуускайдааҕы фельдшерскэй-акушерскай оскуолаҕа үөрэнэ киирэр уонна 1932с. ситиһиилээхтик бүтэрэр. Оскуолаҕа талбыт идэтин сөбүлээн, интэриэһиргээн үөрэммитэ. Диагноз туруорарыгар оскуолаттан ылбыт билиитэ, онтон кэлин саҥа тахсар периодиканы ааҕан, тус бэйэтин опытынан мындырдык толкуйдаан айымньылаахтык үлэлиирэ.

Олоҕун олуктара

• 1933-35сс - Орто Халымаҕа биэлсэринэн үлэлээбитэ.
• 1935-51сс - Элгээйитээҕи фельдшерскэй-акушерскай пууну уонна учаастактааҕы балыыһаны салайан улэлэппитэ.
• 1953с - ССКП кэккэтигэр чилиэнинэн киирбитэ. Элгээйитээҕи Совекка түөрт төгүл, Саха АССР Верховнай Советыгар үс төгүл депутатынан талыллан үлэлээбитэ.
• 1951-57сс - Элгээйитээҕи сэллиги эмтиир санаторий сэбиэдэссэйэ.
• 1957-59сс - Элгээйи балыыһатын сэбиэдэссэйэ.
• 1959-80сс - Элгээйитээҕи сэллиги эмтиир санаторий ординатора.
• 1980с - олоҕун тиһэх күнүгэр диэри Элгээйи иҥнэнэн эмтиир кабинетын сэбиэдэссэйинэн үлэлээбитэ.

Дьиэ кэргэнэ, аймахтара

Кэргэнэ Александра Спиридоновна Рупова(1917-79) - начальнай кылаастарга учууталынан үлэлээбитэ. Кинилэр биир кыыс, түөрт уол оҕоломмуттара. Улахан уоллара Кларус Семенович Яковлев - ювелир-маастар, кыыстара Клара Семеновна Саввина - терапевт уонна иглорефлексотерапевт быраас, Станислав Семенович Яковлев - ветеринарнай быраас, Валерий Семенович Яковлев - Элгээйигэ леснигинэн, Антон Федорович Яковлев - Бүлүү куоратыгар киномеханигынан үлэлээбиттэрэ.

Наҕараадалара

• Икки "Бочуот Знага" орден кавалера.
• "1941-45сс Аҕа дойду сэриитигэр үлэҕэ килбиэнин иһин".
• "1941-45сс Аҕа дойду Улуу сэриитигэр Кыайыы 40 сыла".
• "В.И.Ленин төрөөбүтэ 100 сылын туолуутугар. Үлэҕэ килбиэнин иһин".
• "Үлэ ветерана" мэтээллэрдээх.
• СССР доруобуйаҕа харыстабылын туйгуна, коммунистическай үлэ ударнига.
• Саха АССР Верховнай Советын Президиумун Бочуотунай грамотатынан түөрт төгүл наҕараадаламмыта.
• Сунтаар оройуонун бочуоттаах олохтооҕо.
• Союзнай суолталаах персональнай пенсионер.

Сигэлэр

• "Удьуор эмчиттэр" кинигэ. Дьокуускай, 2015с А.В.Дохунаева.
• "Чолбон"№3 сурунаал, кулун тутар 2006с Н.Е.Винокуров.
• "Саха Сирэ" хаһыат, балаҕан ыйын 22 күнэ, 2006с