Ермолаев Алексей Николаевич

Ермолаев Алексей Николаевичсахалартан бастакы Аан дойду кылаастаах спорт маастара, ССРС эдэрдэргэ чемпиона. 

Олоҕун олуктара уларыт

Алексей Николаевич Ермолаев 1941 сыллаахха Чурапчы Кытаанаҕар төрөөбүтэ. Оройуон киинин оскуолатыгар үөрэнэр кэмигэр Дмитрий Петрович Коркин салайар секциятыгар сылдьан көҥүл тустуунан дьарыктаммыта. Салгыы Дьокуускайдааҕы педучилище физкультурнай отделениетыгар үөрэммитэ. Манна тренер Н.Н.Волков салалтатынан эрчиллибитэ.Алексей Ермолаев республикатааҕы типографияҕа ретушер быһыытынан үлэлиир сылларыгар Коммунистическай Үлэ ударнига буолбута.Күрэхтэһиигэ ситиһиилэрин туһунан билиһиннэрдэххэ, 1962 сыллаахха Саха сирин норуоттарын Спартакиадатыгар кыайыылааҕынан тахсыбыта. 1964 сыллаахха Дьокуускайга ыытыллыбыт РСФСР чемпионатыгар 57 киилэҕэ Петр Алексеев кэнниттэн иккис миэстэни ылбыта. 1965 сыллаахха Гомель куоракка ыытыллыбыт ССРС эдэрдэргэ күрэхтэһиитигэр финалга, кэлин олимпийскай чемпион буолбут дагестанец З.Абдулбековы сабырыйан чемпион бочуоттаах аатын ылбыта. Бу сыл Нальчикка, Спартак общество Россиятааҕы күрэхтэһиитигэр тэҥнээҕин булбатаҕа. 1966 сыл киниэхэ үрдүк көрдөрүүлэри тосхойбута. Ол курдук, төрөөбүт Сахатын сирин чемпионунан буолбута, Аан дойду аччыгый чемпионатынан аатырар Тбилиситээҕи норуоттар икки ардыларынааҕы турнирга призердаабыта, Венгрияҕа буолбут турнирга кыайыылааҕынан тахсыбыта. Итиэннэ сахалартан бастакынан ССРС спордун норуоттар икки ардыларынааҕы кылаастаах маастарын нуорматын толорбута. Маны таһынан А.Н.Ермолаевка спортка үрдүк ситиһиилэрин иһин Дьокуускай куорат Бочуоттаах гражданина үрдүк аат иҥэриллибитэ. Алексей Николаевич кэлин «Спартак» общество республикатааҕы салаатыгар инструкторынан, Дьокуускай 1-кы нүөмэрдээх профтехучилищетын преподавателинэн уонна тренеринэн үлэлээбитэ.Сахалартан бастакынан ССРС эдэрдэргэ чемпиона буолан уонна норуоттар икки ардыларынааҕы кылаастаах маастар нуорматын толорон А.Н.Ермолаев Саха сирин спортка историятыгар чиэстээхтик киирбитэ. Алексей Николаевич 1991 сыллаахха биһиги кэккэбититтэн туораабыта. Кини ситиспит үрдүк көрдөрүүтэ эдэр ыччаты көҕүлээн, саха тустууктарын дьоһун кыайыыга сирдээбитэ диэн этиэх кэриҥнээхпит. 

Ситиһиилэрэ уларыт

1962с. - Саха сирин норуоттарын Спартакиадатыгар 1 миэстэ

1964с. - Дьокуускайга ыытыллыбыт РСФСР чемпионатыгар 2 миэстэ

1965с. - Гомель куоракка ССРС эдэрдэргэ күрэхтэһиитигэр 1 миэстэ

1966с.- Саха сирин чемпиона, Тбилиси куоратка норуоттар икки ардыларынааҕы турнирга призер, Венгрияҕа буолбут турнирга чемпион.