Saas Ustar

Егор Михайлович Васильев –Saas Ustar (атын биллэр аата Jeada) (балаҕан ыйа 15, 1988 с., Майа, Мэҥэ Хаҥалас, Саха АССР) – Саха сирин биллэр ырыа толорооччута уонна айааччыта, “саха-рэп” сүүрээни сайыннарааччы, Danketsy бөлөх тэрийээччитэ, поэт, тыа сирин ыччатын иитии уонна түмүү үлэтигэр көхтөөх кыттааччы. 2003 сылтан саҕалаан 5 альбом, 3 клип, 2 концертнай видеодиск таһаарда, ону таһынан, 2005 с. Сергей Зверев “Далаһа устун уҥуор” киинэтигэр сүрүн оруолу толорбута. Бэйэтин кэмигэр саамай эдэр киэҥ эйгэҕэ биллибит ырыаһыт (“Мин сахабын” дебютнай трегын 9-с кылааска уһулбута). Саха сириттэн ураты, Бурятияҕа, Тываҕа биллэр. Санкт-Петербурга Герцен аатынан университекка кэтэхтэн үөрэнэр. 2007 сылтан кэргэннээх, 2011 с. уол оҕоломмута. 2012 с. сайыныгар "Саха сирин ыччат политикатын туйгуна" ааты ылбыта.

Saas Ustar
Сүрүн информация
Аата	Егор Михайлович Васильев
Төрөөбүтэ	Балаҕан ыйын 15 1988(1988-09-15) Саха АССР, СССР
Жанра	Хип-хоп, Саха-рэп, Spoken-word
Идэтэ	Ырыаһыт, Ырыа айааччы, Продюсер
Ыллаабыт сыллара	2003 сылтан ыла бэттэх

Биографията

1988-2003: Оҕо сааһа уонна оскуолатын сыллара

Егор Васильев балаҕан ыйын 15 күнүгэр Майаҕа Розалия Петровна уонна Михаил Михайлович дьиэ кэргэннэригэр иккис оҕонон төрөөбүтэ. Оскуолаҕа үөрэнэ сылдьан, уруһуй кылааһыгар эбии үөрэммитэ, үлэлэрэ араас күрэхтэһиилэргэ бэлиэтэнэллэрэ. Кэлин музыкальнай оскуолаҕа киирбитэ, маҥнай духовой оркестрга барабанщиктаабыта, онтон утуу-субуу атын инструменнары баһылаабыта. Хоһоон-ырыа суруйуутунан алтыс кылаастан дьарыктанан барбыта, ол кэмҥэ элбэх саха айымньытын аахпыта. Рэп-музыканан үлүһүйүү Майаҕа 2000 сылтан үөдүйбүтэ, Гоша маҥнайгы рэп-бөлөҕүн 2002 с. тэриммитэ – Street Flame диэн бөлөххө B-Snake (Егор Васильев, Jeada, Saas Ustar), Эгма, Гифтед (Купер), Малой, Окс (Игорь Дьячковский, 5ак, Digi Dough) киирбиттэрэ. Кэнники “Близнецы. Двойная импровизация” диэн ааттарын уларыппыттара, манна эбии Vantalla (Антон Федулов), Sikel (Василий Решетников) уонна Nas (Савва Скрябин) киирбиттэрэ. Оччолорго уолаттар улаханнык биллибэт этилэр, ырыа уһуларга да уустук этэ. 2003 сыллаахха бөлөх Danketsy (“единство” – дьоппуоннуу) диэн ааттааммыта (Jeada, Vantalla, Sikel уонна Nas) , ол сыл сайыныгар элбэх трек уһулубуттара (кэлин бу ырыалартан сорохторо Jeada бастакы альбомугар киирбиттэрэ).

2003-2006: “Мин сахабын”

2003 сыл күһүөрү “Мин сахабын” диэн сахалыы рэп аан маҥнай “Сахалыы Виктория” араадьыйа долгунугар тыаһаабыта, тута хит буолбута. Бу ырыаны Гоша убайын, “Ночная Смена” дьокуускайдааҕы нууччалыы тылынан толорор рэп-бөлөх кыттааччытын, Александр Васильевы-Safe кытта Майаҕа уһулбута; “Мин сахабын” интернеккэ тахсан, араадьыйаҕа маҥнай “Ночная Смена” ырыатын курдук биллэриллэр этэ. Кэлин “бу майатааҕы 9-с кылаас үөрэнээччитин ырыата” диэн биллибитэ. Айдааннаах, мөккүөрдээх, ол да буоллар саханы түмэр ырыа Гоша Республикаҕа киэҥник биллэригэр олук буолбута. Бу кэнниттэн субуруччу радиоҕа “Сүрэхпит тэбэрин тухары”, “Арыый ураты киһибин”, “Күндү миэхэ эн эрэ аатыҥ (Диана)”, “Атаарабын” ырыалар хит буолбуттара. “Атаарабын” Гошаны Республикатааҕы “Этигэн Хомус” музыкальнай бириэмийэҕэ таһаарбыта, 2004 сыл түмүгүнэн “Сыл бастыҥ арыйыыта” номинацияҕа ааттаммыта да, бириэмийэни кыайбатаҕа. Ол оннугар, “Дойду биир эрэ” ырыатын ыллаан, “Көрөөччү биһирэмин” ылбыта. Бастакы сольнай кэнсиэрэ Дьокуускайга 2005 с. ааспыта. Danketsy кыттыылаах программата “Сүрэхпит тэбэрин тухары” диэн этэ, кэнники DVD формакка тарҕаммыта. 2006 сыллааҕы “Этигэн хомуска” “Мин тапталым кистэлэҥэ” диэн Джида уонна Ника ырыалара “Бастыҥ холбоһук бырайыак” аакка тура сылдьыбыта. Бу сыл өссө Кызылга (Тыва) кэнсиэрдии бара сылдьыбыта, Игорь Чактар диэн тыва рэперин кытта “Тыва-Якутия” диэн трек таһаарбыттара. Маны таһынан, көхтөөх ыччат буоларын быһыытынан, Гоша бүтэрбит Майа гуманитарнай оскуолатын президенэ этэ. ”Jeada таабырынын таайарга турунан...” диэн 2006 сыллаахха Николай Кривошапкин кинигэ суруйбута.

2007: “Olokh/Ostuoruya” уонна “Эппэтэх санааларым”

Өр соҕус “сүтэ” сылдьан баран, 2007 сыл сайыныгар Иннокентий Гаврильев-Лэкиэс aARTyk студиятыгар уһуллубут “Olokh/Ostuoruya: sanaalar-onoolor 2004-2007” альбом тахсар. Альбомҥа Sash T, Ника, Игорь Чактар, Сахалина Ширяева, North Sound кыттыбыттара. Хомуурунньук ордук музыкальнай уонна философскай буолбута, лирика да киирбитэ. Ол сыл күһүнүгэр интернет ситимҥэ “Эппэтэх санааларым” диэн альбом тахсыбыта. Альбом уратыта диэн, Jeada радио-студияҕа ыалдьыттыы олорорун курдук, хас биирдии ырыа иннигэр ыытааччы ыйытыыларыгар кылгастык хоруйдуур.

2008-2011: Хотугу Киин

СГУ саха тылын уонна культуратын факультетыгар биир сыл үөрэнэн баран, Гоша 2008 с. Санкт-Петербурга үөрэххэ киирбитэ. Манна сахалар (“землячество”) уонна азия омуктарын түмсүүлэригэр сотору-сотору ыллыыр этэ. Үөрэҕин таһынан, саҥа альбому бэлэмнээбитэ. Ол курдук, 2008 с. бүтүүтүгэр “Tap-tal” күн сирин көрбүтэ. Манна музыкатыгар Николай Михеев-Navel үлэлэспитэ, Ульяна Сергучева-Күннэй, Никита Веркин-Кокраш, Sash T ылласпыттара. Нөҥүө сыл сайын “Tap-tal-га” клип уһуллубута (реж. Константин Тимофеев). Бу кэмтэн бэттэх Гоша Saas Ustar диэн ааты ылыммыта, бу хос аат суолтатын

“Саас устар - эргиппэккин тугу даҕаны.
Саас устар, арай санаа эрэ үйэлээх.
Саас устар, түгэни куоттарыма эн.
Саас устар, арай эн манна хаал” –

диэн тылларга булуохха сөп. (Saas Ustar – “Saas Ustar (skit)”) Саҥа санаалардаах, дойдуга бэринии, дьиэ кэргэн, политика темаларыгар киэҥ көрүүлээх ырыалар “Saas Ustar” диэн альбомҥа 2009 сыл кыһын түмүллүбүттэрэ. “Өрүү маннык халлаан, өрүү маннык сулустар, хайдах да сырыт – саас устар” диэн тыллардаах “Saas Ustar” альбом сүрүн ырыатыгар Санкт-Петербурга клип уһуллубута. Альбомҥа Navel, Smile, Муравейник, Ночная Смена, Александр Лукин ылласпыттара. Бу сыл өссө Wazimular диэн экспериментальнай проект хамсаабыта, Saas Ustar уонна 5ak (Digi Dough) 9 тректаах интернет-альбом таһаарбыттара. Wazimular концепциятынан киһи "иккис бэйэтин" кытта кэпсэтии буолбута. 2010 сыл сайыныгар “Айар Айан” диэн ыччат десанын кытта улуустары кэрийэн,тыа сирин ыччатын проблемаларын туһунан төгүрүк остуолларга кыттыбыта (тэрийээччилэр “Түмэн” уонна “Одун” ыччат түмсүүлэрэ), десант түмүгүнэн Дьокуускайга кэнсиэр ааспыта. 2010 с. Гоша киинэҕэ төннөн, DetSaT (Алексей Егоров – Өркөн, Дмитрий Шадрин – Шандор, Степан Порядин уо.д.а.) айар түмсүүнү кытта “Көҥүл Боотурдар” диэн историческай комедия оҥоһуутугар тыас-уус өттүгэр үлэлээбитэ, киинэ сүрүн музыкальнай тематын (OST) Александр Лукинныын толорбуттара. 2011 сылтан Гоша университекка кэтэхтэн үөрэнэргэ сананан, кэргэнин кытта Дьокуускайга көһөн барбыттара. Бу сыл сайыныгар Saidar Plus айар бөлөҕү кытта үлэлээбитэ, “Герои: Битва за кубок” диэн киинэ OST-ун суруйбута уонна толорорбута, “Тургутуу” ырыаҕа промо-клип уһулбуттара. Күһүн Улан-Удэҕа (Бурятия) улахан кэнсиэр тэрийбитэ, бүрээт омугу кытта сомоҕолоһуу бэлиэтинэн Alagui диэн Бурятияҕа биллэр рэп-толорооччуну кытта “Улан-Удэ - Якутск” диэн трек буолар. 2011 сыл түмүгүнэн “Сахалыы Виктория” радиостанция “Тургутууну” “Сыл бастыҥ ырыата” номинацияҕа биллэрбитэ да, “Этигэн Хомус” статуэтката эмиэ аһары барбыта.

2012: Саҥа кэрчик: Туоххаһыйбаппын

2012 сааһыары Saas Ustar уонна DJ Ashimi Республиканан “Туоххаһыйбаппын” диэн программанан гастроллууллар, саҥа “Мөккүспэппин” диэн ырыа тута хит буолар. Сайын, Saidar Plus-тары кытта үлэни салҕаан, “Герои 2: Турнир Скорпиона” диэн киинэ музыкатын оҥорсубута, “Аартыкка” диэн OST-ка Лэкиэс ылласпыта.

Дискографията

Альбома	Сыла
Мин Сахабын	2003
Olokh/ostuoruyA	2007
Эппэтэх Санааларым	2007
OlokhTulaSanaalar	2008
Tap-tal	2009
SAAS USTAR	2010

Клиптара

Аата	Сыла
Tap-tal	2009
Saas ustar	2010
Тургутуу	2011

Сигэлэр

• Saas Ustar айар үлэтигэр аналлах бөлөх Вконтакте
• Saas Ustar Твиттергэ
• "Айар Айан" туһунан Эдэр Сааска