Скрябин Михаил Степанович

Скрябин Михаил Степанович — (1955, муус устар 7 Амма улууһа, Абаҕа нэһ. - 2016, кулун тутар 26, Дьокуускай) Саха Сирин үөрэҕириитин отличнига, Россия физическай культуратын уонна спордун отличнига, Саха Сирин үтүөлээх тренера, Амма улууһун уонна Абаҕа нэһилиэгин бочуоттаах олохтооҕо. Скрябин Валерий Степанович бииргэ төрөөбүт быраата.

Скрябин Михаил Степанович

Олоҕун оллуктара уларыт

Михаил Амма Абаҕатыгар 1955 с. муус устар 7 күнүгэр күн сирин көрбүтэ. 1970 Чурапчыга Дмитрий Петрович Коркиҥҥа үөрэнэр, училищены бүтэрээт биир сыл Д.П. Коркиҥҥа үлэлиир, онтон 1973 Минскэйдээҕи физкультура уонна спорт институтугар үөрэҕин салҕыыр. 1978 тренер быһыытынан Минскэйгэ СДЮШОР-га үлэтин саҕалыыр, ол сыл күһүнүгэр аармияҕа барар. 1980 Саха Сиригэр төннөр, ШВСМ-ҥа тренердиир. 1985 Аммаҕа оҕо спортивнай оскуолата аһыллыаҕыттан төрөөбүт дойдутугар бэйэтин баҕатынан төннөн 2004 дылы үлэлиир. Бу сылларга Амма улууһун тустуу спортсменнарын ситиһиилэрэ Михаил Степановиһы кытта сыһыаннаах. 2004 Чурапчытааҕы физкультура уонна спорт институтугар тренерынан ананар. Билигин Дьокуускай куоракка Олимпийскэй резервэ училищетыгар старшай тренеринэн үлэлиир.

2016, кулун тутар 26 ыарахан ыарыы содулуттан күн сиртэн күрэннэ.

Ситиһиилэрэ уларыт

Тустууга эрчийиигэ бииргэ үлэлиир коллегаларын кытта саҥа системаны олохтообут. Амма ДЮСШ-атыгар үлэтин кэмигэр 4 Аан дойду спорт маастарын бэлэмнээбит, олор быыстарыгар: Нь.В. Иванов — Ярыгин аатынан аан дойдутааҕы күрэскэ чемпиона, 1994; А. СоловьевГреция Гран при чемпиона, 1996; эдэрдэргэ Первенство России чемпиона, Москва, 1995; Аан дойдуга II призер, 1994, Будапешт, Венгрия; Павел Капитонов — Гран При чемпиона, Польша; улахаттарга Россияҕа II призер, 2001; саллааттар быыстарыгар чемпион Мира. ССРС 11 спорт маастарын, Россия 21 спорт маастарын бэлэмнээбит. Чурапчы институгар 2 Аан дойду спорт маастарын уонна 2008 Пекин олимпиадатын кыттыылааҕын — Корякин Виталийы кылгас кэм иһигэр бэлэмнээбит.

Аатын үйэтитии уларыт

 
Аммаҕа баар Михаил Степанович аатынан сквер
  • Аммаҕа кини аатынан уулусса уонна сквер ааттаммыттара.
  • Дьокуускайга, кини аатынан оҕолорго аналлаах көҥүл тустууга сыл ахсын ааһар күрэс ыытыллар.